چیئرمین ای یو پاک فرینڈشپ یورپ، ڈاکٹر پرویز اقبال لوہسر (تمغۂ خدمت) نے کہا ہے کہ پاک فوج ریاست کی محافظ ہے اور ہر حال میں ملک کا دفاع کرے گی۔ انہوں نے کہا کہ پاکستانی قوم اور اوورسیز پاکستانی پاک فوج کے ساتھ بھرپور یکجہتی کا اظہار کرتے ہوئے اس کے شانہ بشانہ کھڑے ہیں۔
یہ بات انہوں نے بیلونیا، اٹلی میں منعقد ہونے والے پہلے ’میری فوج، میرا پاکستان‘ کنونشن میں بطور مہمانِ خصوصی خطاب کرتے ہوئے کہی۔ کنونشن میں طلبا، نوجوان، بزرگ شہری اور مقامی کمیونٹی سمیت زندگی کے ہر شعبے سے تعلق رکھنے والے ہزاروں افراد نے شرکت کی۔
مزید پڑھیں: اسلامی فوجی انسداد دہشتگردی اتحاد کے سیکریٹری جنرل کی فیلڈ مارشل سید عاصم منیر سے ملاقات
شرکا نے فیلڈ مارشل جنرل سید عاصم منیر کی بڑی قد آور تصاویر اٹھا کر ان سے اپنی محبت اور وابستگی کا اظہار کیا۔
کنونشن بریشیا، اٹلی میں مقیم پاکستانی کمیونٹی نے منعقد کیا، جبکہ آرگنائزنگ کمیٹی میں چوہدری اکرام اللہ (پنڈی سلطان پور)، قیصر بشیر کنگ (فتح پور)، چوہدری دلشاد مون (چھنی)، چوہدری فیصل چیچی، چوہدری اخلاق لوہسر، چوہدری امجد رولیا اور اسجد چندالہ شامل تھے۔
جرمنی سے چوہدری عامر وڑائچ آف جمنا نے بھی خصوصی طور پر کنونشن میں شرکت کی۔
ڈاکٹر لوہسر نے کہا کہ اوورسیز پاکستانی پاک فوج کے خلاف کسی بھی منفی بین الاقوامی پروپیگنڈے کو مسترد کرتے ہیں اور فوج کے ساتھ ثابت قدمی سے کھڑے ہیں۔ انہوں نے مزید کہا کہ موجودہ عالمی صورتحال میں پاکستان مثبت کردار ادا کر رہا ہے جو دنیا کو تنازعات سے بچانے میں مددگار ثابت ہوگا۔
انہوں نے کہا کہ اوورسیز پاکستانی ملک کی معیشت کو مضبوط بنانے اور عالمی سطح پر پاکستان کا مثبت تشخص اجاگر کرنے میں اہم کردار ادا کر رہے ہیں۔
ڈاکٹر لوہسر نے نریندر مودی کو مقبوضہ جموں و کشمیر میں انسانی حقوق کی خلاف ورزیوں پر تنقید کا نشانہ بنایا اور عالمی برادری سے اس کا نوٹس لینے کا مطالبہ کیا۔ انہوں نے اس بات پر زور دیا کہ پاکستان کے استحکام اور ترقی کے لیے اتحاد، سالمیت اور اجتماعی ذمہ داری نہایت ضروری ہیں۔
مزید پڑھیں: برطانوی چیف آف جنرل اسٹاف کی فیلڈ مارشل سید عاصم منیر سے ملاقات
کنونشن کے دوران ایک نوجوان نے قرارداد پیش کی کہ حالیہ پاک بھارت تنازع میں عالمی سطح پر کردار ادا کرنے اور 10 مئی 2025 کو شہری آبادی کو نشانہ نہ بنانے پر فیلڈ مارشل سید عاصم منیر کو نوبل امن انعام دیا جائے۔ اس قرارداد کو تمام شرکا نے متفقہ طور پر منظور کر لیا۔
کنونشن کے اختتام پر شرکا نے بھرپور جوش و خروش کے ساتھ ’پاکستان زندہ باد‘، ’پاک فوج زندہ باد‘ اور ’فیلڈ مارشل جنرل سید عاصم منیر زندہ باد‘ کے فلگ شگاف نعرے لگائے۔
