پاکستان انٹرنیشنل ایئرلائنز (پی آئی اے) نے جیٹ فیول کی بڑھتی ہوئی قیمتوں کے باعث مختلف شعبوں سے تعلق رکھنے والے افراد کو دی جانے والی تمام رعایتیں ختم کرنے کا فیصلہ کر لیا ہے۔
پی آئی اے کے ترجمان کے مطابق مشرق وسطیٰ میں جاری کشیدگی اور ایران کے ساتھ تنازع کے باعث عالمی توانائی اور کارگو سپلائی متاثر ہوئی ہے، جس کے نتیجے میں ایندھن کی قیمتوں میں نمایاں اضافہ دیکھا جا رہا ہے۔
یہ بھی پڑھیے: اسلام آباد پولیس کا شہریوں سے زیادہ کرایہ وصول کرنے والے ٹرانسپورٹرز کے خلاف کریک ڈاؤن
ترجمان نے بتایا کہ حالیہ دنوں میں جیٹ فیول کی اوسط قیمت 195 ڈالر فی بیرل تک پہنچ گئی ہے جو گزشتہ سال کے مقابلے میں دو گنا سے بھی زیادہ ہے۔ پاکستان میں بھی جیٹ فیول کی قیمت میں 40 روپے فی لیٹر اضافہ ہوا ہے، جس کے بعد نئی قیمت 517 روپے 17 پیسے فی لیٹر ہو گئی ہے۔
پی آئی اے کے مطابق بڑھتے ہوئے مالی دباؤ کے باعث ایئرلائن نے طلبہ، بینک ملازمین، بزرگ شہریوں، صحافیوں، ریٹائرڈ فوجی اہلکاروں اور ایئرپورٹ سکیورٹی فورس کے ارکان سمیت تمام خصوصی رعایتیں ختم کر دی ہیں۔
یہ بھی پڑھیے: مشرق وسطیٰ کشیدگی کا اثر، جیٹ فیول کی قیمتوں میں پانچویں بار اضافہ
ترجمان نے کہا کہ ‘پی آئی اے شدید مالی دباؤ کا شکار ہے، اسی وجہ سے تمام شعبوں کو دی جانے والی رعایتیں عارضی طور پر ختم کی گئی ہیں۔’
انہوں نے مزید کہا کہ یہ فیصلہ اس وقت تک برقرار رہے گا جب تک ایندھن کی قیمتیں معمول پر نہیں آ جاتیں۔
