وزیراعلیٰ خیبرپختونخوا سہیل آفریدی نے کہا ہے کہ موجودہ حالات میں پاکستان کا کردار قابلِ تحسین ہے اور عالمی سطح پر ملک کو پذیرائی مل رہی ہے۔
پشاور میں پریس کانفرنس کے دوران انہوں نے کہاکہ پاکستان کی ترقی کے پیش نظر راولپنڈی کے لیاقت باغ میں ہونے والا جلسہ ملتوی کیا گیا ہے، اور اب آئندہ 10 روز کے اندر خیبرپختونخوا میں جلسہ منعقد کیا جائے گا۔
سہیل آفریدی نے بتایا کہ راولپنڈی کا جلسہ بانی پی ٹی آئی عمران خان کی ہدایت پر ہی ملتوی کیا گیا۔
انہوں نے کہاکہ عمران خان کی ہدایت حتمی ہے، اس پر مزید بات نہیں ہو سکتی۔ جلسہ بھی انہی کی ہدایت پر پاکستان کی ترقی کے لیے ملتوی کیا گیا۔
سہیل آفریدی نے وفاق کی ثالثی اور ایران امریکا کشیدگی میں مثبت کردار کو بھی سراہا۔ انہوں نے کہاکہ پی ٹی آئی پاکستان کی ترقی چاہتی ہے۔
خیبرپختونخوا میں جلسہ کب اور کہاں ہوگا؟
سہیل آفریدی کے مطابق عمران خان نے ہدایت دی ہے کہ جلسہ خیبر پختونخوا میں ہی کیا جائے۔ تاہم کس ضلع میں جلسہ ہوگا، اس کا فیصلہ پارٹی قیادت باہمی مشاورت سے کرے گی۔
انہوں نے مزید کہاکہ صوبائی کابینہ میں جلد توسیع متوقع ہے، تاہم اس کے بغیر بھی مختلف محکمے مؤثر انداز میں کام کر رہے ہیں۔
واضح رہے کہ پی ٹی آئی نے ملک میں اہم سفارتی میٹنگز کے باعث آج راولپنڈی میں ہونے والا جلسہ منسوخ کردیا ہے۔
