ڈھاکا کی ایک عدالت نے انقلابی تنظیم انقلاب منچا کے کنوینر شریف عثمان بن ہادی کے قتل کے مرکزی ملزم کو اسلحہ کیس میں 10 سال قیدِ با مشقت کی سزا سنا دی ہے۔
راہول اور داؤد کے نام سے بھی معروف ملزم فیصل کریم مسعود کو ایڈیشنل میٹروپولیٹن سیشن جج محمود المحسن نے آرمز ایکٹ کے تحت مجرم قرار دیا۔
حکام کے مطابق مذکورہ ملزم مفرور ہے، جس پر عدالت نے اس کی گرفتاری کے لیے وارنٹ بھی جاری کر دیا ہے۔
یہ بھی پڑھیں: عثمان ہادی قتل کیس کے مرکزی ملزمان کا عدالت میں الزامات سے انکار
کیس کی تفصیلات کے مطابق ریپڈ ایکشن بٹالین (راب-2) نے 7 نومبر 2024 کو ادابر کے علاقے بیت الامان ہاؤسنگ سوسائٹی میں ایک فلیٹ پر چھاپہ مار کر فیصل کو گرفتار کیا تھا۔
کارروائی کے دوران ایک غیر ملکی ساختہ پستول اور 4 گولیاں برآمد کی گئیں۔
بعد ازاں راب کے ایک اہلکار کی مدعیت میں ادابر تھانے میں آرمز ایکٹ کے تحت مقدمہ درج کیا گیا۔
مزید پڑھیں: عثمان ہادی قتل کیس: مرکزی ملزم فیصل کے معاون کو بھارت میں گرفتار کر لیا گیا
ایف آئی آر میں استغاثہ نے مؤقف اختیار کیا کہ فیصل ایک فہرست شدہ مسلح مجرم ہے جو بھتہ خوری، منشیات کی اسمگلنگ اور قتل سمیت منظم جرائم میں ملوث رہا ہے۔
تفتیش کاروں کے مطابق وہ ان جرائم کے لیے غیر قانونی اسلحہ استعمال کرتا تھا۔
پولیس نے گزشتہ سال 28 مارچ کو چالان عدالت میں جمع کرایا جبکہ مقدمے کی سماعت کے دوران 13 گواہوں کے بیانات قلمبند کیے گئے، فیصل گزشتہ سال 17 نومبر تک ضمانت پر رہا ہوا تھا۔
مزید پڑھیں: شہید عثمان ہادی کے قاتلوں کی گرفتاری میں مدد دینے والے کیلیے 50 لاکھ ٹکہ انعام، سکھس فار جسٹس کا اعلان
ملزم کا نام اس وقت زیادہ منظرِ عام پر آیا جب 12 دسمبر 2025 کو دارالحکومت کے علاقے بجوئے نگر کے قریب شریف عثمان بن ہادی پر قاتلانہ حملے میں گولیوں کا نشانہ بنایا گیا۔
وہ 18 دسمبر کو سنگاپور میں دورانِ علاج زخموں کی تاب نہ لاتے ہوئے انتقال کر گئے۔
قبل ازیں اطلاعات تھیں کہ بھارتی پولیس نے رواں سال مارچ میں مغربی بنگال کے بان گاؤں بارڈر کے قریب فیصل کو ہادی قتل کیس کے سلسلے میں حراست میں لیا تھا۔
