پاکستان بار کونسل نے پاکستان کی خارجہ پالیسی اور حالیہ سفارتی کامیابیوں کو سراہتے ہوئے اسے خطے میں امن کے قیام کے لیے اہم قرار دیا ہے۔
کونسل کے وائس چیئرمین پیر محمد مسعود چشتی اور ایگزیکٹو کمیٹی کے چیئرمین منیر احمد ملک نے وزیر اعظم کی جانب سے ایران اور امریکا کے درمیان کشیدگی کے خاتمے کے لیے کی جانے والی ثالثی کوششوں کو قابلِ تحسین قرار دیا۔
یہ بھی پڑھیں: پاکستان بار کونسل کے وائس چیئرمین نے گلگت بلتستان وکلا برادری کے مطالبات کی حمایت کردی
بار کونسل کے جاری کردہ اعلامیے اعلامیے میں سید عاصم منیر اور اسحاق ڈار کی سفارتی کاوشوں کو بھی سراہا گیا۔
پاکستان بار کونسل کے مطابق پاکستان کی مؤثر سفارتکاری کے نتیجے میں ایران اور امریکا کے درمیان دشمنی میں کمی آئی اور آبنائے ہرمز دوبارہ کھل گئی، جو عالمی توانائی ترسیل کے لیے نہایت اہم گزرگاہ ہے۔
اعلامیے میں کہا گیا کہ حکومت پاکستان کے تعمیری سفارتی اقدامات نے جنگ بندی کی راہ ہموار کی اور خطے میں کشیدگی کم کرنے میں کلیدی کردار ادا کیا۔
کونسل نے کہا کہ پاکستان کے بروقت اور اصولی مؤقف نے اسے ایک ذمہ دار اور امن پسند ملک کے طور پر مزید مضبوط کیا ہے۔
مزید پڑھیں: پاکستان بار کونسل اور سپریم کورٹ بار کی مشترکہ اعلامیہ، قانون کی بالادستی اور آئینی عدالت کے قیام کی حمایت
اعلامیے میں اس بات پر زور دیا گیا کہ ایران اور امریکا مستقبل میں کسی بھی مسلح تصادم سے گریز کریں اور انتہائی تحمل کا مظاہرہ کریں۔
پاکستان بار کونسل نے دونوں ممالک پر زور دیا کہ وہ پائیدار مذاکرات، علاقائی خودمختاری کے احترام اور بین الاقوامی قوانین کی پاسداری کو یقینی بنائیں۔
اعلامیے میں مزید کہا گیا کہ خلیجی خطے کے استحکام اور عالمی سطح پر توانائی کی ترسیل کے محفوظ راستوں کے لیے کشیدگی کا خاتمہ ناگزیر ہے۔
