اسلام آباد پولیس کے ترجمان نے غیر ملکی وفود کی آمد کے پیش نظر 11 اور 12 اپریل کے لیے اہم ٹریفک ایڈوائزری جاری کرتے ہوئے شہریوں کو غیر ضروری سفر سے گریز اور متبادل راستے اختیار کرنے کی ہدایت کی ہے، جبکہ شہر میں سکیورٹی ہائی الرٹ کر دی گئی ہے۔
ترجمان کے مطابق سری نگر ہائی وے اور ایکسپریس ہائی وے پر مختلف مقامات پر ڈائیورژنز لگائی جائیں گی، جبکہ ریڈ زون میں سرکاری گاڑیوں کے علاوہ ہر قسم کی ٹریفک کا داخلہ مکمل طور پر ممنوع ہوگا۔ شہریوں کو ہدایت کی گئی ہے کہ وہ ریڈ زون کی جانب سفر سے اجتناب کریں اور قانون نافذ کرنے والے اداروں سے مکمل تعاون کریں۔
یہ بھی پڑھیں:اسلام آباد میں امریکا ایران مذاکرات، ٹریفک پولیس کا ڈائیورژن پلان جاری
جاری کردہ متبادل ٹریفک پلان کے مطابق جی ٹی روڈ پشاور سے راولپنڈی آنے والے شہری فیصل موڑ، چکری، چک بیلی روڈ اور روات روڈ استعمال کریں، جبکہ لاہور سے پشاور جانے والی ٹریفک کو روات، چک بیلی روڈ، چکری اور ٹیکسلا موٹروے کی جانب موڑا جائے گا۔ اسی طرح بھارہ کہو، کورنگ روڈ، بنی گالہ اور لہتراڑ روڈ کو بھی متبادل راستوں کے طور پر استعمال کرنے کی ہدایت دی
پلان کے تحت زیرو پوائنٹ سے کورال چوک تک ایکسپریس وے دونوں اطراف سے ٹریفک کے لیے بند رہے گی، جبکہ 11 اور 12 اپریل کو اسلام آباد میں ہر قسم کی ہیوی ٹریفک کے داخلے پر بھی پابندی عائد ہوگی۔ اس کے علاوہ ریڈ زون کے تمام راستے مکمل طور پر بند رکھے جائیں گے۔
شہریوں کو ہدایت کی گئی ہے کہ وہ تازہ ترین ٹریفک معلومات کے لیے اسلام آباد ٹریفک پولیس کے واٹس ایپ چینل، سوشل میڈیا پلیٹ فارمز اور ایف ایم 92.4 سے رہنمائی حاصل کریں تاکہ کسی بھی پریشانی سے بچا جا سکے۔
