امریکا اور ایران کے مابین مذاکرات پر میڈیا کو آگاہی کے لیے وزارت اطلاعات و نشریات نے وزارت داخلہ کے اشتراک سے کنونشن سینٹر میں خصوصی انتظامات کر دیے ہیں، ’اسلام آباد ٹاکس‘ کی کوریج کے لیے دنیا بھر سے 50 سے زیادہ غیر ملکی صحافی پاکستان پہنچ گئے ہیں، جنہیں ایئرپورٹ پر ہی انٹری ویزے کی سہولت فراہم کی گئی۔
پاکستان میں موجود 150 سے زیادہ غیر ملکی صحافیوں کو باضابطہ دعوت دی گئی ہے جبکہ پاکستان میں الیکٹرانک اور پرنٹ میڈیا سے وابستہ صحافیوں کو بھی باقاعدہ کوریج کارڈ جاری کیے گئے ہیں۔ اس کے علاوہ وفود کے ساتھ ایران اور امریکا کے صحافیوں کی آمد بھی جاری ہے۔
کنونشن سینٹر میں غیر معمولی حفاظتی انتظامات کے علاوہ مہمانوں کی تواضع کا بھی انتظام ہے، ریڈیو پاکستان کی ایک ٹیم مہمانوں کو موسیقی سنانے کے لیے بھی کنونشن سینٹر کے برآمدے میں موجود ہے، کنونشن سینٹر کے مرکزی ہال میں مختلف ممالک کے صحافیوں کو کوریج کی سہولتیں فراہم کی گئی ہیں جہاں آج بھی ملکی و غیر ملکی صحافی اپنی پیشہ وارانہ خدمات انجام دیتے رہے۔
کنونشن سینٹر میں امریکا، ایران اور پاکستان کے جھنڈے اور بڑے بڑے بینرز بھی آویزاں کیے گئے ہیں۔
وفاقی وزیر اطلاعات و نشریات عطااللہ تارڑ نے امریکا ایران مذاکرات کی کوریج کے لیے قائم کیے گئے کنونشن سینٹر میں انٹرنیشنل میڈیا سینٹر کا دورہ کیا۔
وفاقی سیکریٹری اطلاعات و نشریات اشفاق خلیل، پی آئی او مبشر حسن اور سینیئر حکام ان کے ہمراہ تھے۔
وزیر اطلاعات نے مذاکرات کی کوریج کے لیے آنے والے غیر ملکی صحافیوں سے ملاقات بھی کی، جس میں ایران، افغانستان، سعودی عرب، ترکیہ اور دیگر ملکوں کے میڈیا نمائندے شامل تھے۔
وزیر اطلاعات نے پاکستان کی ثالثی کوششوں کے حوالے سے غیر ملکی صحافیوں کے جذبات اور خیالات کو سراہا۔
عطااللہ تارڑ نے انٹرنیشنل میڈیا سینٹر میں سہولتوں کا بھی جائزہ لیا اور اس پر اطمینان کا اظہار کیا۔ وزارت اطلاعات و نشریات اور وزارت خارجہ نے انٹرنیشنل میڈیا سینٹر میں غیر ملکی صحافیوں کے لیے سہولتیں فراہم کیں ہیں۔
