سونا کشی سنہا نے سلمان خان کے اسٹارڈم کے بارے میں بات کرتے ہوئے کہا کہ سلمان خان اپنے کام کے تئیں بالکل بے پروا ہیں، لیکن وہ اپنے کام کے لیے پرعزم ہیں۔
اداکارہ سونا کشی سنہا نے 2010 میں سلمان خان کی فلم دبنگ سے اپنے فلمی کیریئر کا آغاز کیا تھا اور حال ہی میں ایک انٹرویو میں جب ان سے پوچھا گیا کہ سلمان خان ملک کے سب سے بڑے سپر اسٹاروں میں سے ایک کیوں ہیں تو سوناکشی نے کہا کہ سلمان خان نے ناظرین سے جڑنے کا ایک طریقہ ڈھونڈ لیا ہے۔
مزید پڑھیں
سونا کشی نے سلمان خان کے ساتھ کئی فلموں میں کام کیا ہے اور انہوں نے کہا کہ سلمان خان کام کے معاملے میں کافی ’لاپروا‘ ہیں، لیکن وہ انتہائی ’پرعزم‘ بھی ہیں۔ انہوں نے اعتراف کیا کہ یہ ایک تضاد کی سی کیفیت اور عجیب واقعہ ہے۔
سوناکشی نے مزید کہا کہ مجھے نہیں معلوم کہ ان کے اس تضاد کی وضاحت کیسے کروں کیونکہ میں نے اسے دیکھا ہے اور ایسا لگتا ہے کہ وہ چھوٹی چھوٹی چیزوں کی پرواہ نہیں کرتے۔ وہی کرتے ہیں جو وہ محسوس کرتے ہیں۔ مثال کے طور پر، اگر وہ چاہیں تو سائیکل چلا کر کام کریں گے، جس وقت انہیں سہولت ہوگی، وہ کھانا کھائیں گے، یہ بہت عجیب بات ہے۔
یوٹیوب چینل پر راج شامانی سے بات کرتے ہوئے سوناکشی نے سلمان جیسے فلمی ستاروں کی مستقل مقبولیت کے راز بارے کہا کہ مجھے لگتا ہے کہ یہ ان کا پرستاروں کے ساتھ بنیادی رابطہ ہے جو وہ اپنے طویل کیرئیر میں اپنی خداداد صلاحیتوں سے بنانے میں کامیاب رہے ہیں اور یہ وہی ہے جو انہوں نے کئی برس تک کیا ہے، یہی وجہ ہے کہ لوگ ان سے محبت کرتے ہیں۔
سوناکشی کا کہنا تھا کہ ایک بار جب وہ سیٹ پر ہوتے ہیں، تو وہ نہیں جاتے ہیں۔ جب تک ان کا کام پورا نہیں ہو جاتا۔ سوناکشی سنہا ان دنوں نیٹ فلیکس سیریز ’ہیرا منڈی‘ کی تشہیر میں مصروف ہیں۔
