سنگاپور کے چڑیا گھر میں ایک ننھے اورنگوٹان کی پیدائش نے دنیا بھر میں توجہ حاصل کر لی ہے۔ اس کی دل موہ لینے والی ویڈیو سوشل میڈیا پر تیزی سے وائرل ہو رہی ہے۔
وائلڈ لائف پارکس کے منتظم ادارے نے بتایا کہ یہ مادہ بچہ 23 مارچ کو پیدا ہوا تھا اور اس وقت اس کی عمر تقریباً 3 ہفتے ہے۔ جاری کی گئی ویڈیو میں دیکھا جا سکتا ہے کہ ننھا اورنگوٹان اپنی ماں سے مضبوطی سے لپٹا ہوا ہے جبکہ ماں اپنے بچے کو مکمل تحفظ اور توجہ فراہم کر رہی ہے۔
View this post on Instagram
اینیمل کیئر سے وابستہ عہدیداروں کے مطابق ماں اور بچہ دونوں صحت مند ہیں۔ پیدائش کے بعد ابتدائی دنوں میں انہیں آرام، ایک دوسرے سے تعلق مضبوط کرنے اور ماحول کے مطابق ڈھلنے کے لیے خصوصی دیکھ بھال اور وقت دیا گیا۔ ماں اور بچے کو 7 اپریل کو دوبارہ ان کے مخصوص رہائشی حصے میں منتقل کر دیا گیا تھا۔
یہ ویڈیو انسٹاگرام پر ہزاروں صارفین کی توجہ حاصل کر چکی ہے جہاں اسے ہزاروں لائکس اور لاکھوں ویوز ملے ہیں۔ صارفین نے ننھے اورنگوٹان کو بے حد خوبصورت اور دلکش قرار دیا ہے۔
واضح رہے کہ اورنگوٹان بنیادی طور پر اورنگوٹان بنیادی طور پر جنوب مشرقی ایشیا کے بارانی جنگلات میں پائے جاتے ہیں۔ یہ دو بڑے جزیروں تک محدود ہیں جو انڈونیشیا، ملائیشیا اور برونائی میں تقسیم ہے اور درختوں پر زندگی گزارنے کی غیر معمولی صلاحیت رکھتے ہیں۔ یہ جانور شدید خطرے سے دوچار نسلوں میں شامل ہیں۔
اس سے قبل بھی سنگاپور کے نائٹ سفاری میں ایک نایاب سنڈا پینگولن کی پیدائش رپورٹ کی گئی تھی جو جنگلی حیات کے تحفظ کے حوالے سے ایک اہم پیش رفت سمجھی جا رہی ہے۔
