امریکا میں 11 ستمبر کے حملوں کی یاد میں منعقدہ تقریب کے دوران نیویارک کے میئر زوہرن ممدانی اور رکن کانگریس الیگزینڈریا اوکاسیو کورٹیز کی ایک ویڈیو سوشل میڈیا پر شدید تنقید کی زد میں آگئی۔
فوکس نیوز کے مطابق متاثرین کے نام پڑھنے کی تقریب کے دوران کیمرے نے ممدانی اور اوکاسیو کورٹیز کو ایک دوسرے سے بات کرتے ہوئے مسکراتے ہوئے دکھایا۔ دونوں کی گفتگو سنائی نہیں دے رہی تھی، تاہم ویڈیو سامنے آنے کے بعد ناقدین نے الزام عائد کیا کہ دونوں تقریب کی سنجیدگی کا خیال نہیں رکھ رہے تھے۔
یہ بھی پڑھیں:9/11 کے 25 سال: امریکا نے کیا سیکھا اور کون سی غلطیاں اب بھی دہرائی جا رہی ہیں؟
سابق امریکی سینیٹر جان مک کین کی بیٹی میگھن مک کین سمیت متعدد افراد نے سوشل میڈیا پر دونوں کو تنقید کا نشانہ بنایا۔ ری پبلکن رکن کانگریس ویسلی ہنٹ نے کہا کہ گراؤنڈ زیرو ایک مقدس مقام ہے اور 11 ستمبر کا دن سیاسی سرگرمی یا تصاویر بنوانے کا موقع نہیں۔
تاہم سابق نیویارک میئر روڈی جیولیانی کے سابق سکیورٹی اہلکار مائیکل راگوسا نے ویڈیو کا دفاع کرتے ہوئے کہا کہ واقعے کو سیاق و سباق سے ہٹ کر پیش کیا گیا۔ ان کے مطابق وہ دونوں کے قریب کھڑے تھے اور کیمرے میں نظر آنے والا لمحہ صرف ممدانی اور اوکاسیو کورٹیز کے ایک دوسرے کو سلام کرنے کا تھا، جبکہ ان کے پیچھے موجود دیگر سیاست دان بھی بات چیت کر رہے تھے۔
AOC and NYC Mayor Zohran Mamdani were captured smiling and laughing together during the 25th-anniversary 9/11 ceremony.
The moment occurred as the names of the victims were being read at Ground Zero.
pic.twitter.com/PBPa0u8rsw— Resist the Mainstream (@ResisttheMS) September 11, 2026
ممدانی تقریب کے دیگر مواقع پر سنجیدہ انداز میں بھی نظر آئے۔ اس کے باوجود ویڈیو پر سوشل میڈیا میں بحث جاری رہی اور ناقدین نے کہا کہ 11 ستمبر کے متاثرین کی یاد میں منعقدہ تقریب کے دوران زیادہ احتیاط اور سنجیدگی کا مظاہرہ ہونا چاہیے تھا۔
