پاکستان کسٹمز نے بدعنوانی اور مبینہ ملی بھگت کے الزام میں اپنے 2 پریوینٹو افسران، عارف علی جمانی اور سمیع اللہ اچکزئی کو گرفتار کر لیا ہے۔
حکام کے مطابق دونوں افسران پر الزام ہے کہ انہوں نے چاندی کی بارز کو سیسے سے تبدیل کرنے میں مبینہ طور پر ملی بھگت کی۔
تفصیلات کے مطابق 5 اپریل کو 688 کلوگرام ضبط شدہ چاندی پاکستان منٹ لاہورمیں جمع کرانے کے لیے ایک ٹیم تعینات کی گئی تھی۔
یہ بھی پڑھیں: پاکستان کسٹمز کی کراچی ائیرپورٹ پر بڑی کارروائی، سونا اور قیمتی سامان برآمد
عارف علی جمانی اورسمیع اللہ اچکزئی پر مشتمل اس ٹیم کو کوئٹہ اسٹیٹ ویئر ہاؤس سے سیل شدہ 36 ڈبوں میں موجود چاندی کی محفوظ ترسیل کی ذمہ داری سونپی گئی تھی۔
بیان کے مطابق یہ ڈبے کوئٹہ انٹرنیشنل ایئرپورٹ منتقل کیے گئے اور پی آئی اے کی پرواز کے ذریعے لاہور کے علامہ اقبال انٹرنیشنل ایئرپورٹ پہنچائے گئے۔
بعد ازاں تمام سیل شدہ ڈبے پاکستان منٹ لاہور منتقل کیے گئے، جہاں کھولنے اور جانچ پڑتال کے دوران انکشاف ہوا کہ مجموعی 688 کلوگرام میں سے تقریباً 400 کلوگرام چاندی جعلی تھی جسے مبینہ طور پر سیسے سے تبدیل کیا گیا تھا۔
مزید پڑھیں: پاکستان میں کسٹمز ویلیو ٹیکس میں کمی کے بعد موبائل فونز کی قیمتوں میں کتنی کمی ہوگی؟
ابتدائی انکوائری میں سیف سٹی کوئٹہ کی سی سی ٹی وی فوٹیج سے یہ بات سامنے آئی کہ دونوں افسران نے مبینہ طور پر اصل چاندی کی کھیپ والی گاڑی کو تبدیل کرکے ایک دوسری گاڑی میں جعلی مواد منتقل کیا۔
اس معاملے پر کلیکٹریٹ آف کسٹمز انفورسمنٹ کوئٹہ نے فیکٹ فائنڈنگ انکوائری شروع کی، جس کے بعد مقدمہ درج کر کے دونوں افسران کو گرفتار کر لیا گیا ہے۔
حکام کے مطابق مزید تفتیش جاری ہے تاکہ اس جرم میں ملوث دیگر افراد یا اہلکاروں کا تعین کیا جا سکے۔
