برطانیہ کی پارلیمنٹ میں رُکن پارلیمان محمد افضل نے پاکستان کے سفارتی کردار کو سراہتے ہوئے کہا کہ پاکستان نے ایران اور امریکا کے درمیان مذاکرات کی میزبانی اور ثالثی کر کے عالمی قیادت کا مظاہرہ کیا ہے۔
انہوں نے برطانوی وزیر اعظم کیئر اسٹارمر سے سوال کیا کہ پاکستان چونکہ برطانیہ کا دیرینہ اتحادی ہے، اس لیے برطانوی حکومت مشرقِ وسطیٰ میں دیرپا امن اور استحکام کے لیے پاکستان کی کس طرح مدد کر رہی ہے۔
یہ بھی پڑھیے: اسحاق ڈار سے چینی سفیر جیانگ زیڈونگ کی ملاقات، امریکا ایران مذاکرات کی ثالثی پر پاکستان کو خراج تحسین
محمد افضل نے اپنے بیان میں وزیر اعظم شہباز شریف، وزیر خارجہ اسحاق ڈار اور آرمی چیف سید عاصم منیر کی کوششوں کو سراہتے ہوئے کہا کہ ان کی کاوشوں سے جنگ بندی ممکن ہوئی جس پر دنیا ان کی احسان مند ہے۔
اس پر جواب دیتے ہوئے برطانوی وزیر اعظم کیئر اسٹارمر نے کہا کہ وہ پاکستان کے کردار پر اپنے شکریے کا اعادہ کرتے ہیں۔ انہوں نے بتایا کہ انہوں نے مذاکرات سے قبل جمعہ کے روز وزیر اعظم شہباز شریف سے بات چیت کی تھی تاکہ ممکنہ تعاون پر غور کیا جا سکے۔
یہ بھی پڑھیے: پاکستان کا ثالثی کردار: عالمی وقار میں اضافہ اور معاشی خوشحالی کی نئی نوید
کیئر اسٹارمر کے مطابق برطانیہ کے وزیر خارجہ نے بھی اپنے پاکستانی ہم منصب سے رابطہ کیا ہے، اور یہ نہایت اہم ہے کہ اس عمل کی حمایت جاری رکھی جائے تاکہ صورتحال کو مزید کشیدہ ہونے سے روکا جا سکے اور امن کی جانب پیش رفت ممکن ہو۔
برطانوی پارلیمان میں ہونے والی اس گفتگو کی کلپ نائب وزیراعظم و وزیر خارجہ اسحاق ڈار نے بھی اپنے ایکس اکاؤنٹ پر شیئر کیا۔
