لاہور ہائیکورٹ نے پنجاب کے نگران وزیراعلی کی تعیناتی کے خلاف دائر درخواست سماعت کے لیے منظور کرتے ہوئے فریقین کو نوٹس جاری کرکے جواب طلب کرلیا ہے۔ خبر رساں ادارے اے پی پی کے مطابق جسٹس شاہد کریم نے عوامی مسلم لیگ کے سربراہ اور سابق وفاقی وزیر داخلہ شیخ رشید احمد کی درخواست پر ابتدائی سماعت کی ۔
لاہور ہائیکورٹ میں دائر درخواست میں پنجاب کے سابق وزیراعلی چوہدری پرویز الہی ، حمزہ شہباز ، صوبائی پارلیمانی کمیٹی ، وفاقی حکومت، صدر پاکستان، الیکشن کمیشن سمیت گورنر پنجاب اور نگران وزیراعلی کو فریق بنایا گیا تھا۔
اس سے قبل سابق وزیر داخلہ اور عوامی مسلم لیگ کے سربراہ شیخ رشید نے نگران وزیر اعلیٰ پنجاب کی تقرری سپریم کورٹ میں چیلنج کرتے ہوئے ان کی تعیناتی کو غیر آئینی قرار دینے کی استدعا کی تھی جسے سپریم کورٹ نے متعدد اعتراضات عائد کرکے واپس کردیا تھا۔
واضح رہے کہ سپریم کورٹ سے درخواست واپس کیے جانے کے بعد شیخ رشید کی جانب سے اظہر صدیق ایڈووکیٹ کی وساطت سے نگران وزیر اعلیٰ کے تقرر کو لاہور ہائیکورٹ میں چیلنج کیا گیا تھا جس میں فاقی حکومت، صدر پاکستان، الیکشن کمیشن کو فریق بنایا گیا ہے۔
درخواست میں کہا گیا کہ محسن نقوی کے نام پراعتراضات کے باوجود ان کو وزیراعلیٰ بنا دیا گیا، الیکشن کمیشن نے باقی 3 ناموں کو مسترد کرنے کی وجوہات نہیں بتائیں۔
