کے الیکٹرک نے کمپنی کے بورڈ آف ڈائریکٹرز میں بڑی تبدیلی کرتے ہوئے شہریار چشتی کو نیا چیئرمین مقرر کردیا ہے۔
اسٹاک ایکسچینج کو بھیجے گئے مراسلے کے مطابق یہ تقرری 2 اپریل 2026 کو ہونے والے غیر معمولی جنرل اجلاس میں ڈائریکٹرز کے انتخاب کے بعد 15 اپریل کو منعقدہ بورڈ کے اجلاس میں عمل میں لائی گئی ہے۔
یہ بھی پڑھیں: نیپرا نے کے الیکٹرک پر کروڑوں روپے جرمانہ کیوں عائد کیا؟
شہریار چشتی انویسٹمنٹ بینکنگ کے شعبے میں طویل تجربہ رکھتے ہیں اور وہ اس سے قبل بجلی کی تقسیم کار مختلف کمپنیوں میں اعزازی طور پر بورڈ ممبر کی حیثیت سے بھی خدمات انجام دے چکے ہیں۔
کے الیکٹرک کی ویب سائٹ پر موجود ان کے پروفائل کے مطابق، ان کی پیشہ ورانہ مہارت سے کمپنی کے انتظامی ڈھانچے کو مزید مستحکم کرنے میں مدد ملے گی۔
واضح رہے کہ کے الیکٹرک میں گزشتہ چند ماہ کے دوران قیادت کی سطح پر کئی تبدیلیاں دیکھنے کو ملی ہیں۔ رواں برس مارچ میں سید طحہٰ کو کمپنی کا نیا چیف ایگزیکٹو آفیسر مقرر کیا گیا تھا، جنہوں نے عبوری سربراہ ادیب احمد کی جگہ لی۔
یہ بھی پڑھیں: سی ای او کے الیکٹرک مونس علوی کو عہدے سے ہٹانے کے حکم امتناع میں توسیع
ادیب احمد کو فروری میں اس وقت عبوری سی ای او بنایا گیا تھا جب سابق سی ای او مونس علوی نے کام کی جگہ پر ہراساں کرنے کے ایک کیس میں اس وقت کے گورنر سندھ کامران ٹیسوری سے کلین چٹ ملنے کے چند روز بعد اپنے عہدے سے استعفیٰ دے دیا تھا۔
ان نئی تقرریوں کے بعد توقع کی جا رہی ہے کہ کے الیکٹرک کی انتظامیہ صارفین کو بجلی کی فراہمی اور آپریشنل چیلنجز سے نمٹنے کے لیے نئی حکمتِ عملی کے ساتھ کام کرے گی۔
