صوبہ سندھ میں منکی پاکس کے کیسز میں تشویشناک اضافہ ہوگیا جہاں اب تک 9 اموات کی تصدیق ہو چکی ہے جبکہ متاثرہ افراد کی تعداد میں مسلسل اضافہ ہو رہا ہے۔
یہ بھی پڑھیں: لاہور میں منکی پاکس کا ایک اور کیس سامنے آگیا
محکمہ صحت سندھ کے مطابق 14 اپریل 2026 تک صوبے بھر میں منکی پاکس کے 122 مشتبہ کیسز رپورٹ ہوئے ہیں جن میں سے 25 کیسز لیبارٹری ٹیسٹ کے ذریعے تصدیق شدہ ہیں۔
حکام کا کہنا ہے کہ صورتحال پر کڑی نظر رکھی جا رہی ہے اور نگرانی کے نظام کو مزید مؤثر بنایا جا رہا ہے۔
گزشتہ 24 گھنٹوں کے دوران مزید دو مشتبہ کیسز سامنے آئے جن میں ایک کراچی اور دوسرا خیرپور میں رپورٹ ہوا جس کے بعد اسکریننگ اور کانٹیکٹ ٹریسنگ کا عمل تیز کر دیا گیا ہے۔
خیرپور میں تعداد سب سے زیادہ
اعداد و شمار کے مطابق خیرپور میں سب سے زیادہ 18 تصدیق شدہ کیسز سامنے آئے ہیں جبکہ کراچی میں 4 اور سکھر میں 3 کیسز رپورٹ ہوئے ہیں۔
حکام کے مطابق متاثرہ اضلاع میں بیماری کے پھیلاؤ کو روکنے کے لیے ہدفی اقدامات کیے جا رہے ہیں۔
محکمہ صحت نے بتایا کہ فوری احتیاطی تدابیر پر عملدرآمد شروع کر دیا گیا ہے جن میں آگاہی مہمات اور طبی مراکز میں نگرانی کا نظام مزید سخت کرنا شامل ہے۔
عوام اور طبی عملے کو ہدایت کی گئی ہے کہ احتیاطی اصولوں پر سختی سے عمل کریں، علامات ظاہر ہونے کی صورت میں فوری رپورٹ کریں اور غیر ضروری میل جول سے گریز کریں۔
مزید پڑھیے: کراچی میں منکی پاکس: بیوی کے بعد شوہر بھی لپیٹ میں آگیا
حکام نے شہریوں کو مشورہ دیا ہے کہ علامات ظاہر ہونے پر فوری قریبی اسپتال سے رجوع کریں، خاص طور پر نومولود بچوں اور کمزور افراد کے ساتھ احتیاط برتی جائے۔
عارضے کی علامات
منکی پاکس ایک وائرل بیماری ہے اور اسے زونوٹک مرض کہا جاتا ہے یعنی یہ جانوروں سے انسانوں میں منتقل ہو سکتی ہے۔
ماہرین کے مطابق افریقی چوہے اور بندر اس وائرس کے ممکنہ میزبان ہو سکتے ہیں۔
یہ بیماری عام طور پر بخار کے بعد جلد پر دانوں کی صورت میں ظاہر ہوتی ہے جو پہلے چہرے سے شروع ہو کر جسم کے دیگر حصوں تک پھیل جاتی ہے۔ اس کے ساتھ سر درد، پٹھوں میں درد، تھکن اور لمف نوڈز کی سوجن جیسی علامات بھی سامنے آ سکتی ہیں۔
مزید پڑھیں: منکی پوکس کی نئی قسم سامنے آ گئی، ہیلتھ اتھارٹی کی وارننگ جاری
منکی پاکس کی علامات ظاہر ہونے کا دورانیہ عموماً 7 سے 14 دن ہوتا ہے تاہم یہ 5 سے 21 دن تک بھی ہو سکتا ہے جبکہ بیماری کا دورانیہ عام طور پر 2 سے 4 ہفتوں پر مشتمل ہوتا ہے۔
