امریکا میں سیکیورٹی خدشات کے باعث ایک اہم سیاسی ایونٹ متاثر ہو گیا، جہاں جے ڈی وینس نے شرکت کی تاہم ایرکا کرک نے سنگین دھمکیوں کے بعد اپنی شرکت منسوخ کر دی۔
یہ بھی پڑھیں:ڈونلڈ ٹرمپ ایران کے ساتھ معمولی نہیں وسیع تر معاہدہ کرنا چاہتے ہیں، جے ڈی وینس
میڈیا رپورٹس کے مطابق ’ٹرننگ پوائنٹ یو ایس اے‘ کے زیر اہتمام ہونے والے اس پروگرام میں ایرکا کرک کو نائب صدر کے ساتھ اسٹیج شیئر کرنا تھا، تاہم تقریب کے آغاز سے چند لمحے قبل انہوں نے سکیورٹی خدشات کے پیش نظر شرکت سے معذرت کر لی۔
جے ڈی وینس نے تقریب کے آغاز پر بتایا کہ ایرکا کرک کو انتہائی سنجیدہ نوعیت کی دھمکیاں موصول ہوئی تھیں، جس کے باعث وہ پریشان تھیں اور ایونٹ کی منسوخی کا بھی خدشہ پیدا ہو گیا تھا۔
انہوں نے کہا کہ سیکیورٹی اداروں، خصوصاً یونائیٹڈ اسٹیٹس سیکرٹ سروس سے مشاورت کے بعد فیصلہ کیا گیا کہ ایرکا کرک کو اپنی اور اپنے خاندان کی حفاظت کو ترجیح دینی چاہیے۔
تقریب جو ٹرننگ پوائنٹ یو ایس اے کی جانب سے ملک گیر کالج ٹور کا حصہ تھی، بالآخر متبادل میزبان کے ساتھ جاری رکھی گئی۔ اس موقع پر تنظیم کے ترجمان اینڈریو کولویٹ نے شرکا کو بتایا کہ ایرکا کرک کو موصول ہونے والی دھمکیوں کے باعث وہ تقریب میں شریک نہیں ہو سکیں۔
یہ بھی پڑھیں:ایران امریکا مذاکرات کا دوسرا دور، جے ڈی وینس، وٹکاف اور جیرڈ کشنر حصہ لیں گے، سی این این
رپورٹس کے مطابق جے ڈی وینس کو بھی ایونٹ کی سکیورٹی پر خدشات تھے، تاہم سکیورٹی کلیئرنس کے بعد انہوں نے تقریب میں شرکت کی۔ یہ پیشرفت امریکا میں سیاسی سرگرمیوں کے دوران بڑھتے ہوئے سکیورٹی خدشات کی عکاسی کرتی ہے۔
