وفاقی دارالحکومت اسلام آباد میں جرائم پیشہ عناصر کے خلاف کارروائیاں تیز کر دی گئی ہیں، جہاں پولیس نے منظم گروہوں کے خلاف کریک ڈاؤن کے دوران موٹرسائیکل چوری میں ملوث ایک گینگ کے 2 ارکان کو گرفتار کر لیا۔
ترجمان اسلام آباد پولیس کے مطابق اسلام آباد میں منظم، مربوط اور مؤثر کارروائیوں کا سلسلہ جاری ہے اور جرائم پیشہ عناصر کے خلاف بڑے پیمانے پر اقدامات کیے جا رہے ہیں۔
تھانہ انڈسٹریل ایریا پولیس نے کارروائی کرتے ہوئے موٹرسائیکل چوری کی متعدد وارداتوں میں ملوث گینگ کے 2 ملزمان کو گرفتار کیا، جن کی شناخت عرفان ساجد اور علی مراد کے ناموں سے ہوئی ہے۔
پولیس کے مطابق گرفتار ملزمان کے قبضے سے لاکھوں روپے مالیت کے 14 مسروقہ موٹرسائیکل برآمد کیے گئے ہیں، جبکہ دورانِ تفتیش ملزمان نے چوری کی متعدد وارداتوں کا اعتراف بھی کیا ہے۔
ڈی آئی جی اسلام آباد محمد جواد طارق نے کہا ہے کہ گرفتار ملزمان کے خلاف مقدمات کو مضبوط بنانے اور انہیں قرار واقعی سزا دلوانے کے لیے تمام قانونی تقاضے پورے کیے جائیں گے۔
انہوں نے واضح کیا کہ شہریوں کو ان کے قیمتی اثاثوں سے محروم کرنے والے عناصر کے خلاف بلا امتیاز کارروائیاں جاری رکھی جائیں گی، جبکہ منظم اور متحرک گینگز کے خلاف بڑے پیمانے پر کریک ڈاؤن جاری ہے۔
