پاکستان میں طبی سیاحت (میڈیکل ٹورازم) کے فروغ کے لیے ایک اہم پیش رفت سامنے آئی ہے، جہاں اسپیشل انویسٹمنٹ فسیلیٹیشن کونسل کے تعاون سے نیشنل میڈیکل ٹورازم انیشی ایٹو کا باقاعدہ آغاز کر دیا گیا۔
یہ اعلان پاکستان ایسوسی ایشن آف پلاسٹک سرجنز کی 30ویں سالانہ بین الاقوامی کانفرنس کے موقع پر کیا گیا، جہاں ماہرین نے میڈیکل اور ٹورازم کے امتزاج کو ملکی معیشت کے لیے ایک نئی سمت قرار دیا۔
اس اقدام کے تحت پاکستان کو خطے میں اعلیٰ معیار اور کم لاگت پلاسٹک اور ری کنسٹرکٹیو سرجری کے مرکز کے طور پر فروغ دیا جائے گا، جبکہ بین الاقوامی مریضوں کے لیے ملک کو ایک پرکشش طبی منزل بنانے پر بھی توجہ دی جائے گی۔
حکام کے مطابق اس منصوبے کے ذریعے ملک بھر میں صحت کے بنیادی ڈھانچے کو مزید مضبوط بنانے کے ساتھ ساتھ عالمی سطح پر پاکستان کے ہیلتھ سیکٹر کو نمایاں کیا جائے گا۔
پاکستان کو اس حوالے سے ماہر طبی افرادی قوت، جغرافیائی اہمیت اور کم لاگت مگر معیاری طبی سہولیات جیسے اہم فوائد حاصل ہیں، جو اسے میڈیکل ٹورازم کے لیے ایک موزوں منزل بناتے ہیں۔
