پاکستان مسلم لیگ (ن) نے آزاد جموں و کشمیر قانون ساز اسمبلی کے عام انتخابات 2026 کے لیے پارٹی ٹکٹوں کی تقسیم اور امیدواروں کے انتخاب کے لیے پارلیمانی بورڈ تشکیل دے دیا ہے، جس کی سربراہی پارٹی قائد نواز شریف کریں گے۔ بورڈ امیدواروں کے چناؤ اور ٹکٹوں کی حتمی منظوری کا مجاز ہوگا۔
یہ بھی پڑھیں:آزاد کشمیر انتخابات: ن لیگ کے ٹکٹ ہولڈرز کے حتمی انٹرویوز نواز شریف کریں گے
جاری نوٹیفکیشن کے مطابق مسلم لیگ (ن) کا تشکیل دیا گیا پارلیمانی بورڈ آزاد کشمیر انتخابات کے لیے امیدواروں کو پارٹی ٹکٹ جاری کرنے سے متعلق تمام فیصلے کرے گا۔
بورڈ میں پارٹی کی اعلیٰ قیادت کو شامل کیا گیا ہے، جس میں نواز شریف کے ساتھ وزیراعظم شہباز شریف اور نائب وزیراعظم اسحاق ڈار بھی شامل ہیں۔اس کے علاوہ احسن اقبال، خواجہ آصف، مریم نواز، حمزہ شہباز، خواجہ سعد رفیق اور رانا ثناء اللہ بھی بورڈ کا حصہ ہوں گے۔
پارلیمانی بورڈ میں آزاد کشمیر کی سیاسی قیادت کو بھی نمائندگی دی گئی ہے، جس میں راجہ فاروق حیدر، شاہ غلام قادر اور مشتاق احمد منہاس شامل ہیں۔ دیگر ارکان میں امیر مقام، مریم اورنگزیب، انوشہ رحمان، کیپٹن (ر) محمد صفدر، برجیس طاہر اور پرویز رشید بھی شامل کیے گئے ہیں۔
نوٹیفکیشن کے مطابق یہ پارلیمانی بورڈ آئندہ انتخابات کے لیے امیدواروں کے انتخاب اور پارٹی ٹکٹوں کی حتمی منظوری کا مکمل اختیار رکھتا ہے۔
