وفاقی وزیر توانائی اویس لغاری نے کہا ہے کہ قطر سے ایل این جی کے 4 کارگو آئندہ 5 روز میں پاکستان پہنچ جائیں گے، جس کے بعد بجلی کی صورتحال میں نمایاں بہتری آئے گی اور لوڈشیڈنگ کا خاتمہ ممکن ہو سکے گا۔
ایک نجی ٹی وی پروگرام میں گفتگو کرتے ہوئے اویس لغاری نے دعویٰ کیا کہ اس وقت بھی ملک میں لوڈشیڈنگ کا دورانیہ ایک سے ڈیڑھ گھنٹے سے زیادہ نہیں ہے۔ ان کے مطابق اضافی گیس دستیاب ہوتے ہی بجلی کی پیداوار میں اضافہ ہوگا۔
یہ بھی پڑھیے: گرمی بڑھتے ہی ملک بھر میں بجلی کا بحران سنگین، غیر اعلانیہ لوڈشیڈنگ میں اضافہ
دوسری جانب ملک بھر میں گرمی کی شدت بڑھنے کے ساتھ غیر اعلانیہ لوڈشیڈنگ میں اضافہ دیکھا جا رہا ہے۔ مختلف میڈیا رپورٹس کے مطابق بجلی کا شارٹ فال تقریباً 4 ہزار میگاواٹ تک پہنچ چکا ہے، جس کے باعث مختلف شہروں میں شہری مشکلات کا سامنا کر رہے ہیں۔
کراچی کے متعدد علاقوں میں طویل بجلی بندش کی اطلاعات ہیں جہاں کئی مقامات پر 10 گھنٹے تک بجلی غائب رہتی ہے۔ راولپنڈی میں بھی 8 سے 10 گھنٹے لوڈشیڈنگ رپورٹ کی گئی ہے۔
اسی طرح اسلام آباد میں کئی علاقوں میں 6 گھنٹے تک بجلی کی بندش جاری ہے، جبکہ لاہور کے مختلف علاقوں میں 5 سے 6 گھنٹے تک لوڈشیڈنگ ہو رہی ہے۔ پشاور میں شہری علاقوں میں 6 گھنٹے جبکہ نواحی علاقوں میں 14 گھنٹے تک بجلی کی بندش نے عوام کو پریشان کر رکھا ہے۔
