بھارت کے شہر حیدرآباد میں ایک سیکیورٹی گارڈ کی غیر معمولی انداز میں ڈیوٹی انجام دینے کی ویڈیو سوشل میڈیا پر وائرل ہوگئی، جس نے نہ صرف لوگوں کی توجہ حاصل کی بلکہ معاشرتی رویوں اور نچلے طبقے کے حالات پر ایک نئی بحث کو جنم دے دیا۔
یہ بھی پڑھیں:ملیریا کے مکمل خاتمے کی راہ ہموار، مچھروں کی مزاحمت توڑنے کا طریقہ دریافت
سوشل میڈیا پلیٹ فارم ایکس پر صارف سورج کمار بودھ کی جانب سے شیئر کی گئی ایک ویڈیو نے انٹرنیٹ پر ہلچل مچا دی ہے، جس میں ایک سیکیورٹی گارڈ کو رات کی ڈیوٹی کے دوران کرسی پر بیٹھے مچھر دانی کے اندر اپنے فرائض انجام دیتے ہوئے دیکھا جا سکتا ہے۔ ویڈیو میں ایک خاتون کی آواز بھی سنائی دیتی ہے جو گارڈ سے بات کر رہی ہوتی ہے جبکہ وہ مسلسل جاگتے ہوئے اپنی ذمہ داریاں نبھا رہا ہوتا ہے۔
ویڈیو شیئر کرتے ہوئے صارف نے سوال اٹھایا کہ جب رہائشی افراد ایئر کنڈیشنڈ کمروں میں آرام کر رہے ہوتے ہیں تو کیا سوسائٹی انتظامیہ اپنے سیکیورٹی گارڈز کے لیے ایک محفوظ اور آرام دہ جگہ فراہم نہیں کر سکتی؟ انہوں نے اس صورتحال کو ہمدردی کی کمی قرار دیتے ہوئے کہا کہ معاشرے میں غریب طبقے کے مسائل کے حوالے سے حساسیت کم ہوتی جا رہی ہے۔
یہ ویڈیو دیکھتے ہی دیکھتے وائرل ہوگئی اور ہزاروں صارفین نے اس پر ردعمل دیا۔ کچھ افراد نے اسے ’دل دہلا دینے والا منظر‘ قرار دیا جبکہ بعض نے اسے جدید دور کی ’خاموش استحصال‘ کی مثال کہا۔ ایک صارف نے تبصرہ کیا کہ ’یہ ڈیوٹی نہیں بلکہ مجبوری ہے‘، جبکہ دوسرے نے لکھا کہ ’یہ منظر معاشرتی ناانصافی کی عکاسی کرتا ہے‘۔
