مریم نواز کے فلیگ شپ ہیلتھ پراجیکٹس، پنجاب میں صحت سہولیات کی نئی مثال قائم

وزیراعلیٰ پنجاب مریم نواز شریف کے 6 فلیگ شپ ہیلتھ پراجیکٹس نے اہم کامیابیاں حاصل کر لی ہیں۔ مختصر ترین مدت میں 2 کروڑ 10 لاکھ مریضوں کو فیلڈ اسپتال اور کلینک آن ویل کے ذریعے علاج اور طبی سہولیات فراہم کی گئی ہیں۔

اسی دوران 30 ہزار سے زیادہ مریضوں کو گھر بیٹھے انسولین، ہیپاٹائٹس اور ٹی بی کی مفت ادویات فراہم کی گئیں۔

مزید پڑھیں: صحت کے میدان میں بڑی کامیابی، مریم نواز نے پنجاب کے عوام کو ایک اور خوشخبری سنا دی

کلینک آن ویل کے تحت ایک کروڑ 82 لاکھ مریضوں کا علاج کیا گیا، 70 لاکھ الٹراساؤنڈ اور 12 لاکھ بچوں کو حفاظتی ٹیکے لگائے گئے۔ فیلڈ اسپتالوں میں 28 لاکھ مریض آئے جبکہ 4 لاکھ 48 ہزار 468 لیب ٹیسٹ اور ایک لاکھ 70 ہزار 772 ایکسرے و الٹراساؤنڈ کیے گئے۔

مراکز صحت کی ری ویمپنگ اور اپ گریڈیشن

پنجاب کی تاریخ میں پہلی مرتبہ 1217 مراکز صحت کی ری ویمپنگ مکمل کی گئی ہے۔ فیز ون میں 1026 بنیادی مراکز صحت اور 191 دیہی مراکز صحت کو اپ گریڈ کیا گیا۔

فیز ٹو میں 433 بنیادی مراکز صحت اور 81 آر ایچ سی کی ری ویمپنگ مکمل ہوئی، جبکہ فیز تھری میں 895 مراکز صحت کی تعمیر و بحالی تیزی سے جاری ہے۔

گھر بیٹھے علاج اور ادویات کی فراہمی

ذیابیطس کے 2242 مریضوں کو 2،2 ماہ کی انسولین گھر پر فراہم کی گئی۔ ہیپاٹائٹس کے 14 ہزار 286 اور ٹی بی کے 13 ہزار 864 مریضوں کو بھی 2،2 ماہ کی ادویات گھر پہنچائی گئیں۔

صحت ڈیٹا، سروے اور مانیٹرنگ سسٹم

کمیونٹی ہیلتھ انسپکٹرز نے پنجاب بھر میں 6 کروڑ 30 لاکھ افراد کی رجسٹریشن مکمل کی، 80 لاکھ گھرانوں اور ایک کروڑ گھروں کا ڈیٹا حاصل کیا گیا۔ جی آئی ایس ٹیم نے 58 ہزار 571 ایریا میپنگ بھی مکمل کی۔

پنجاب بھر میں 251 سرویلنس اسسٹنٹس اسپتالوں اور مراکز صحت کی ڈیجیٹل مانیٹرنگ اور ٹریکنگ کررہے ہیں، جبکہ ہر مریض کو اوسطاً 5 منٹ میں علاج شروع کیا جا رہا ہے۔

کارڈیک سہولیات اور ضلعی اسپتالوں میں پیش رفت

جہلم، جھنگ، میانوالی اور وہاڑی کے ضلعی اسپتالوں میں امراض قلب کے مراکز اور کیتھ لیب منصوبے کے تحت 1628 پروسیجرز کیے گئے۔ ان میں 1055 انجیوگرافی، 559 انجیوپلاسٹی، 12 پرائمری پی سی آئی اور 2 عارضی پیس میکر شامل ہیں۔

وزیراعلیٰ کی ہدایات اور اظہار اطمینان

وزیراعلیٰ مریم نواز شریف نے سیکریٹری ہیلتھ اینڈ پاپولیشن نادیہ ثاقب اور پوری ٹیم کی کارکردگی کو سراہا اور اطمینان کا اظہار کیا۔

مزید پڑھیں: پنجاب میں صحت کارڈ کے ذریعے مفت علاج کی سہولت ختم کرنے کا فیصلہ

انہوں نے ضلعی اسپتالوں میں اسٹروک مینجمنٹ سنٹر کے قیام، مراکز صحت کی ری ویمپنگ رواں سال مکمل کرنے اور سرکاری اسپتالوں میں نرسنگ ڈگری نشستیں بڑھانے کی ہدایت بھی جاری کی۔