وفاقی وزیر خزانہ سینیٹر محمد اورنگزیب نے کہا ہے کہ پاکستان نے عالمی مالیاتی فنڈ (آئی ایم ایف) کے ساتھ اسٹاف لیول معاہدہ مکمل کرلیا ہے، جس کی ایگزیکٹو بورڈ سے جلد منظوری متوقع ہے۔ منظوری کے بعد پروگرام کی اگلی قسط جاری کر دی جائے گی۔
وزارت خزانہ کے مطابق وزیر خزانہ نے ایس اینڈ پی گلوبل ریٹنگز کے نمائندگان سے ملاقات میں پاکستان کی معاشی صورتحال میں بہتری اور عالمی مالیاتی منڈیوں میں دوبارہ رسائی پر تبادلہ خیال کیا۔
اس موقع پر انہوں نے بتایا کہ پاکستان نے حال ہی میں 1.4 ارب ڈالر کا یورو بانڈ کامیابی سے ادا کیا ہے۔
انہوں نے سعودی عرب کی جانب سے 3 ارب ڈالر کی اضافی مالی معاونت اور 5 ارب ڈالر کے ڈپازٹ کی مدت 2028 تک بڑھانے کا بھی ذکر کیا، جس سے ملک کی بیرونی مالی پوزیشن مزید مستحکم ہوگی۔
وزیر خزانہ کے مطابق یہ پیش رفت پاکستان کی معاشی پالیسیوں اور اصلاحاتی عمل پر اعتماد میں اضافے کی عکاس ہے۔
انہوں نے کہاکہ درمیانی مدت کی مالی حکمت عملی اور بہتر معاشی اشاریے ملک کی کریڈٹ ریٹنگ میں بہتری کے لیے مضبوط بنیاد فراہم کررہے ہیں۔
