ملک کے مختلف بالائی علاقوں میں بارش، بعض مقامات پر ژالہ باری اور پہاڑی علاقوں میں برفباری کے باعث موسم سرد ہو گیا ہے۔ محکمہ موسمیات نے آج بھی خیبر پختونخوا، پنجاب اور آزاد کشمیر کے بالائی علاقوں میں مزید بارشوں کی پیشگوئی کی ہے۔
یہ بھی پڑھیں:آئندہ 12 سے 24 گھنٹوں کے دوران گرج چمک کے ساتھ بارش، این ڈی ایم اے کا الرٹ جاری
ملک کے مختلف علاقوں میں بارش اور بعض مقامات پر ژالہ باری ریکارڈ کی گئی ہے، جس سے موسم میں واضح ٹھنڈک بڑھ گئی ہے۔
خیبر پختونخوا میں سوات، کرک، ملاکنڈ، ایبٹ آباد اور مانسہرہ میں بارش ہوئی، جبکہ گلیات اور وادی ناران میں برفباری کے باعث سردی کی شدت میں اضافہ ہو گیا۔
وادی نیلم میں لینڈ سلائیڈنگ کے باعث مرکزی شاہراہ کیل شیخ بیلہ کے مقام پر بند ہو گئی، جس کے نتیجے میں سیاحوں کی 20 سے زائد گاڑیاں پھنس گئیں۔ حکام کے مطابق متعدد مسافروں کو قریبی آبادی میں عارضی رہائش فراہم کر دی گئی ہے۔
بلوچستان کی وادی زیارت کے بالائی علاقوں، توبہ اچکزئی اور توبہ کاکڑی میں بھی بارش ہوئی۔ بارش کے باعث شاہراہ قراقرم کوہستان کے علاقے لاچی نالہ کے قریب لینڈ سلائیڈنگ کے بعد بند ہو گئی ہے۔
یہ بھی پڑھیں:قطبی گرداب کا آخری موسمی مرحلہ شروع، اپریل میں بھی سردی اور برفباری کے خطرات
محکمہ موسمیات کے مطابق ملک کے بالائی علاقوں میں آج بھی بارشوں کا سلسلہ جاری رہنے کا امکان ہے، جبکہ پہاڑی علاقوں میں مزید برفباری بھی متوقع ہے۔ شہریوں اور سیاحوں کو احتیاط برتنے کی ہدایت کی گئی ہے۔
