اسلام آباد اور راولپنڈی میں کل سے تمام سرکاری و نجی دفاتر کی غیر معینہ مدت کے لیے بندش کے حوالے سے سوشل میڈیا پر گردش کرنے والا نوٹیفکیشن مکمل طور پر جعلی ثابت ہوا ہے۔
یہ بھی پڑھیں: راولپنڈی اور اسلام آباد میں ٹرانسپورٹ اڈے آج رات سے بند، احکامات جاری
اتوار کی شام وائرل ہونے والے اس مبینہ حکم نامے نے شہریوں میں شدید تشویش پیدا کردی تھی، جس میں دعویٰ کیا گیا تھا کہ 20 اپریل سے جڑواں شہروں کے تمام دفاتر اگلے حکم تک بند رہیں گے۔ تاہم ضلعی انتظامیہ نے فوری ایکشن لیتے ہوئے اس کی تردید کردی ہے۔
انتظامیہ نے واضح کیا ہے کہ حکومت کی جانب سے ایسی کوئی ہدایت جاری نہیں کی گئی بلکہ یہ شرپسند عناصر کی جانب سے پھیلائی گئی ایک من گھڑت دستاویز ہے۔
یہ بھی پڑھیں: اسلام آباد میں دکانیں اور شاپنگ مالز رات 8 بجے بند کرانے کے احکامات جاری
تحقیقات کے مطابق وائرل ہونے والی تصویر میں ڈسٹرکٹ مجسٹریٹ اسلام آباد کے پرانے نوٹیفکیشن کو ایڈیٹنگ سافٹ ویئر کے ذریعے تبدیل کر کے نئی تاریخیں ڈالی گئی ہیں تاکہ عوام میں بے چینی پھیلائی جاسکے۔
انتظامیہ نے شہریوں کو خبردار کیا ہے کہ وہ سوشل میڈیا پر موجود ایسی غیر تصدیق شدہ خبروں پر یقین نہ کریں اور تمام سرکاری و نجی ادارے پیر کے روز اپنے معمول کے مطابق کام جاری رکھیں گے۔
یہ بھی پڑھیں: اسلام آباد میں کیا دیکھوں اور فارغ وقت کہاں گزاروں؟ امریکی صحافی نے پاکستانیوں سے تجاویز مانگ لیں
حکام کا مزید کہنا ہے کہ اس قسم کے جعلی نوٹیفکیشن تیار کرنے اور انہیں وائرل کرنے والوں کے خلاف قانونی کارروائی کے لیے ایف آئی اے کے سائبر کرائم ونگ سے بھی رابطہ کیا جا رہا ہے تاکہ ذمہ داران کا تعین کیا جاسکے۔
