پاکستان تحریک انصاف (پی ٹی آئی) نے 2 مئی کو لاہور میں مینارِ پاکستان کے مقام پر جلسہ کرنے کا فیصلہ کر لیا ہے۔ جلسے میں خیبر پختونخوا کے وزیر اعلیٰ سہیل آفریدی کے خطاب کا بھی امکان ہے۔
اس سلسلے میں پاکستان تحریک انصاف لاہور کے صدر میاں اکرم عثمان نے ڈپٹی کمشنر لاہور کو جلسے کی اجازت کے لیے باضابطہ درخواست جمع کروا دی ہے۔
یہ بھی پڑھیے: پی ٹی آئی مینار پاکستان گراؤنڈ میں جلسے کے لیے نئی درخواست کے ساتھ پھر کوشاں
درخواست میں مؤقف اختیار کیا گیا ہے کہ پارٹی ایک قانونی اور رجسٹرڈ سیاسی جماعت ہے اور پرامن سیاسی سرگرمیوں کا انعقاد اس کا آئینی حق ہے۔ مجوزہ اجتماع پاکستان کے آئین کے تحت دیے گئے بنیادی حقوق کے دائرے میں آتا ہے جن میں پرامن اجتماع، اظہارِ رائے اور تنظیم سازی کی آزادی شامل ہے۔
درخواست میں عدالتِ عظمیٰ اور لاہور ہائی کورٹ کے فیصلوں کا حوالہ دیتے ہوئے مؤقف اپنایا گیا ہے کہ پرامن اجتماع ایک بنیادی آئینی حق ہے جس میں ریاست بلاوجہ رکاوٹ نہیں ڈال سکتی۔
یہ بھی پڑھیے: پی ٹی آئی کا مردان جلسہ: سہیل آفریدی کے خلاف نعروں کی گونج، حاضری بھی توقعات سے کم رہی
درخواست میں یہ بھی بتایا گیا ہے کہ وزیراعلیٰ خیبر پختونخوا سہیل آفریدی لاہور کے دورے پر آئیں گے اور جلسے سے خطاب کریں گے۔
