پاکستان میں توانائی کی ضروریات پوری کرنے کے لیے پاکستان ایل این جی لمیٹڈ نے بین الاقوامی سپلائرز سے اپریل اور مئی کے لیے ایل این جی کارگو کی خریداری کا ٹینڈر جاری کر دیا ہے۔
یہ بھی پڑھیں:مشرق وسطیٰ بحران: آذربائیجان نے پاکستان کو ایل این جی فراہم کرنے کی پیشکش کردی
میڈیا پورٹس کے مطابق پاکستان ایل این جی لمیٹڈ نے ملک میں گیس کی بڑھتی ہوئی طلب کو پورا کرنے کے لیے 3 ایل این جی کارگو خریدنے کی پیشکش طلب کی ہے۔ کمپنی نے یہ ٹینڈر جمعرات کو جاری کیا، جس کے تحت تقریباً ایک لاکھ چالیس ہزار مکعب میٹر گیس کے کارگو درکار ہیں۔
پی ایل ایل یہ کارگو ڈیلیورڈ ایکس شپ (DES) بنیاد پر کراچی کے پورٹ قاسم پر وصول کرے گا۔ کارگو کی ڈیلیوری ونڈوز 27 سے 30 اپریل، یکم سے 7 مئی اور 8 سے 14 مئی مقرر کی گئی ہیں، جبکہ ٹینڈر 24 اپریل کو بند ہوگا۔
پی ایل ایل وزارتِ توانائی (پیٹرولیم ڈویژن) کے تحت کام کرنے والا ایک سرکاری ادارہ ہے، جو حکومت پاکستان کی مکمل ملکیتی کمپنی ہے اور ملکی سطح پر ایل این جی کی درآمد، ذخیرہ، تقسیم اور فراہمی کے پورے نظام کو منظم کرتا ہے۔
ذرائع کے مطابق حالیہ دنوں میں پاکستان کو توانائی کے شعبے میں قلت کا سامنا ہے، جس کے باعث ملک کو عالمی مارکیٹ سے فوری ایل این جی کارگو حاصل کرنے کی کوششیں تیز کر دی گئی ہیں۔ اس سے قبل بھی آذربائیجان کی سرکاری توانائی کمپنی نے پاکستان کو ضرورت پڑنے پر فوری ایل این جی فراہم کرنے کی پیشکش کی تھی۔
یہ بھی پڑھیں:قطر سے پاکستان کو ایل این جی کی فراہمی میں پیشرفت، مذاکرات حتمی مرحلے میں داخل
توانائی ماہرین کے مطابق پاکستان کو مقامی گیس کی پیداوار میں کمی اور عالمی منڈی میں قیمتوں کے اتار چڑھاؤ کے باعث مشکلات کا سامنا ہے، جس کی وجہ سے ایل این جی کی بروقت فراہمی ملک کی توانائی ضروریات کے لیے انتہائی اہم ہو گئی ہے۔
