بنگلہ دیش کرکٹ ٹیم نے نیوزی لینڈ کرکٹ ٹیم کو تیسرے ایک روزہ میچ میں 55 رنز سے شکست دے کر 3 میچوں کی سیریز 2-1 سے اپنے نام کر لی۔
بنگلہ دیش کی یہ دوسری فتح نجم الحسن شانتو کی بروقت سنچری اور مصطفیٰ الرحمان کی 5 وکٹوں کی شاندار کارکردگی کی بدولت ممکن ہوئی۔
جمعرات کو چٹوگرام میں کھیلے گئے اس میچ میں بنگلہ دیش نے پہلے بیٹنگ کرتے ہوئے شانتو کی صبر آزما 105 اور لٹن داس کی شاندار 76 رنز کی اننگز کی بدولت نیوزی لینڈ کو جیت کے لیے 266 رنز کا ہدف دیا۔
یہ بھی پڑھیں: بنگلہ دیش کرکٹ تنازع: بُلبُل کا آئی سی سی سے مداخلت کا مطالبہ
جواب میں کیوی ٹیم ابتدائی مشکلات کے بعد مستحکم نظر آئی، تاہم پوری ٹیم 44.5 اوورز میں 210 رنز پر ڈھیر ہوگئی۔
میچ کے بعد کپتان مہدی حسن میراز نے کہا کہ یہ آسان میچ نہیں تھا، لیکن بولرز نے شاندار کارکردگی دکھائی۔
ان کے مطابق وکٹ اسپنرز کے لیے مددگار اور فاسٹ بولرز کے لیے غیر متوازن باؤنس فراہم کر رہی تھی، جبکہ ابتدائی وکٹیں حاصل کرنا اہم تھا۔
Driven by Najmul Hossain Shanto’s fourth ODI century and a record-breaking sixth five-wicket haul from Mustafizur Rahman, Bangladesh secured another home series victory over New Zealand.#TBSNews #BangladeshvsNewZealand pic.twitter.com/GLrOjw8HkR
— The Business Standard (@tbsnewsbd) April 23, 2026
نیوزی لینڈ کے نک کیلی نے 59 رنز بنا کر ٹیم کو امید دلائی، تاہم وہ مصطفیٰ الرحمان کی گیند پر آؤٹ ہوگئے، جس کے بعد بنگلہ دیشی بولر نے یکے بعد دیگرے وکٹیں حاصل کر کے میچ کا رخ موڑ دیا۔
آخر میں ڈین فوکس کرافٹ کی 75 رنز کی جارحانہ اننگز بھی ٹیم کو شکست سے نہ بچا سکی۔
اس سے قبل نیوزی لینڈ نے ٹاس جیت کر بنگلہ دیش کو بیٹنگ کی دعوت دی اور ول او رورک نے ابتدائی اوورز میں 2 اہم وکٹیں لے کر میزبان ٹیم کو مشکلات سے دوچار کیا۔
مزید پڑھیں: آئی سی سی کے فیصلوں کی وجہ سے کرکٹ میں بڑھتی ہوئی تقسیم پر بنگلہ دیش کرکٹ بورڈ کی تشویش
بعد ازاں شانتو اور لٹن داس کے درمیان 160 رنز کی شراکت نے ٹیم کو سنبھالا دیا۔
لٹن داس کو جیڈن لینکس نے آؤٹ کیا، جبکہ شانتو نے 2024 کے بعد اپنی پہلی ون ڈے سنچری مکمل کی اور پھر رنز کی رفتار بڑھانے کی کوشش میں آؤٹ ہوگئے۔
میچ کے بہترین کھلاڑی شانتو نے کہا کہ وکٹ بیٹنگ کے لیے آسان نہیں تھی اور لٹن داس نے ایک اینڈ سنبھال کر بہترین کھیل پیش کیا۔
مزید پڑھیں: سرفراز احمد قومی ٹیم کے ہیڈ کوچ مقرر، بنگلہ دیش کیخلاف ٹیسٹ سیریز کے لیے اسکواڈ کا بھی اعلان
بنگلہ دیش نے مقررہ اوورز میں 8 وکٹوں کے نقصان پر 265 رنز بنائے، جس میں توحید ہردوئے کے 33 اور مہدی حسن میراز کے 22 رنز بھی شامل تھے، جبکہ بین لسٹر نے آخری لمحات میں 2 وکٹیں حاصل کیں۔
سیریز کے پہلے میچ میں نیوزی لینڈ نے 26 رنز سے کامیابی حاصل کی تھی، جبکہ دوسرے میچ میں بنگلہ دیش نے 6 وکٹوں سے فتح سمیٹ کر سیریز برابر کر دی تھی۔
دونوں ٹیموں کے درمیان اب اگلے ہفتے چٹوگرام میں 3 ٹی20 میچز کی سیریز کھیلی جائے گی۔
