ایران اور امریکا کے درمیان جاری امن مذاکرات کے تناظر میں وفاقی دارالحکومت میں پیدا ہونے والی غیر یقینی صورتحال کے باعث تبلیغی جماعت نے اپنا سالانہ اجتماع ایک ہفتے کے لیے ملتوی کر دیا ہے۔
منتظمین کے مطابق موجودہ حالات کے پیش نظر رائیونڈ سے مشاورت کے بعد اجتماع کی نئی تاریخ مقرر کی جائےگی۔ یہ اجتماع پہلے 24 سے 26 اپریل تک اسلام آباد میں ہونا تھا۔
مزید پڑھیں:پاکستان کی کوششوں سے امن قائم ہو گا، اسلام آباد کے شہریوں کی رائے
اجتماع کے منتظم مفتی محمد وقاص رفیع کا کہنا ہے کہ یہ فیصلہ حالات کا جائزہ لینے کے بعد حکومت کی سہولت کے لیے کیا گیا۔ انہوں نے مزید کہا کہ اگر صورتحال برقرار رہی تو تاریخ میں مزید تبدیلی یا اجتماع کی منسوخی بھی ممکن ہے۔ ضلعی انتظامیہ اور منتظمین کے درمیان سیکیورٹی صورتحال پر مسلسل رابطہ جاری ہے۔
حکام کے مطابق اسلام آباد میں اس وقت غیر یقینی صورتحال اس وقت تک برقرار رہ سکتی ہے جب تک امن مذاکرات کے حوالے سے واضح پیشرفت سامنے نہیں آتی۔
واضح رہے کہ اس اجتماع میں ملک بھر سے قریباً اڑھائی سے تین لاکھ افراد شرکت کرتے ہیں اور یہ گزشتہ 2 دہائیوں سے باقاعدگی سے منعقد ہو رہا ہے۔
دوسری جانب ضلعی انتظامیہ کا کہنا ہے کہ شہر بھر کے پیٹرول پمپس پر پیٹرول اور ڈیزل کے وافر ذخائر موجود ہیں، تاہم بعض مقامات پر عارضی قلت کی اطلاعات کا جائزہ لیا جا رہا ہے۔ بھاری گاڑیوں کے داخلے پر پابندی کے باعث کچھ پمپس کو مسائل کا سامنا رہا، جنہیں ٹینکرز کے ذریعے سپلائی فراہم کی جا رہی ہے۔
انتظامیہ کے مطابق تمام پیٹرول پمپس کی نگرانی ڈیجیٹل نظام کے تحت کی جا رہی ہے اور کسی بھی قلت کی صورت میں فوری کارروائی کی جائے گی۔
ادھر ریڈ زون بدستور بند ہے جبکہ وہاں واقع سرکاری دفاتر میں عملہ گھروں سے کام کر رہا ہے۔ سیکیورٹی اقدامات اور مختلف داخلی راستوں کی بندش کے باعث شہر کے بعض علاقوں میں ایندھن کی کمی اور شہریوں کی نقل و حرکت متاثر ہوئی ہے۔
مزید برآں، انٹرا سٹی اور بین الاضلاعی پبلک ٹرانسپورٹ بھی معطل رہی جبکہ ہائی سیکیورٹی زون سے گزرنے والی سی ڈی اے بس سروسز بھی بند کر دی گئی ہیں۔
