وزیراعلیٰ سندھ سید مراد علی شاہ نے گل پلازہ آتشزدگی کے متاثرین کے لیے 7 ارب روپے کے جامع مالیاتی پیکج کا اعلان کرتے ہوئے کہا ہے کہ اب تک 5 ارب 65 کروڑ روپے جاری کیے جا چکے ہیں، جبکہ 200 تصدیق شدہ متاثرین میں 51 کروڑ 17 لاکھ روپے کے چیکس تقسیم کیے گئے ہیں۔
وزیراعلیٰ ہاؤس میں منعقدہ تقریب سے خطاب کرتے ہوئے مراد علی شاہ نے کہا کہ گل پلازہ سانحہ ایک انتہائی افسوسناک واقعہ تھا، جس میں قیمتی جانوں کے ساتھ کاروباری طبقے کو بھی شدید مالی نقصان پہنچا۔
یہ بھی پڑھیے: سانحہ گل پلازہ: سندھ حکومت کا جوڈیشل کمیشن کی رپورٹ پر عملدرآمد یقینی بنانے کا فیصلہ
انہوں نے بتایا کہ پہلے مرحلے میں جاں بحق 72 افراد کے خاندانوں کے لیے فی کس ایک کروڑ روپے امداد کا اعلان کیا گیا تھا، جن میں سے 64 خاندانوں کو ادائیگی مکمل ہو چکی ہے، جبکہ باقی کیسز قانونی اور تصدیقی مراحل میں ہیں۔
انہوں نے مزید کہا کہ دوسرے مرحلے میں 849 متاثرہ دکانداروں کو رمضان المبارک کے دوران فی کس 5 لاکھ روپے دیے گئے تاکہ وہ دوبارہ روزگار شروع کر سکیں۔
وزیراعلیٰ سندھ نے کہا کہ کراچی چیمبر آف کامرس کی رپورٹ کے مطابق گل پلازہ میں 1,209 دکانیں تھیں، اور نقصانات کے تخمینے کے مطابق امدادی رقم تقسیم کی جا رہی ہے۔ باقی متاثرین کو بھی تصدیق مکمل ہونے پر ادائیگیاں کر دی جائیں گی۔
یہ بھی پڑھیے: گل پلازا کمیشن کا سندھ بلڈنگ کنٹرول اتھارٹی کو نوٹس، قانونی وضاحت طلب کرلی
مراد علی شاہ نے اعلان کیا کہ گل پلازہ کی نئی عمارت دو سال میں تعمیر کی جائے گی، جس میں پہلے جتنی ہی دکانیں ہوں گی۔
انہوں نے کہا کہ عدالتی کمیشن کی سفارشات پر عملدرآمد کے لیے کمیٹی قائم کر دی گئی ہے اور ذمہ دار افراد کے خلاف کارروائی ہوگی۔
اس موقع پر صوبائی وزراء، کراچی چیمبر کے نمائندے، سرکاری افسران اور متاثرین کی بڑی تعداد موجود تھی۔
