امریکی صدر ڈونلڈ ٹرمپ نے ایران امریکا مذاکرات میں پاکستان کے کردار کو سراہتے ہوئے وزیراعظم اور فیلڈ مارشل کی پھر تعریف کی ہے۔
میڈیا سے گفتگو کرتے ہوئے امریکی صدر ڈونلڈ ٹرمپ نے کہا کہ ایرانی خود بھی نہیں جانتے کہ اصل میں فیصلے کون کرتا ہے۔
مزید پڑھیں: ’گھر واپس آ جاؤ‘: صدر ٹرمپ نے پاکستان میں موجود امریکی صحافی کو امریکا واپس آنے کا کہہ دیا
انہوں نے کہاکہ فیلڈ مارشل اور وزیراعظم شہباز شریف بہترین شخصیات ہیں اور پاکستان نے ایران امریکا تنازع حل کرانے کے لیے بہترین کردار ادا کیا ہے۔
ایک سوال کے جواب میں امریکی صدر نے کہاکہ یہ بات بالکل واضح اور سادہ ہے کہ ایران کو جوہری ہتھیار رکھنے کی اجازت نہیں دی جا سکتی۔
واضح رہے کہ امریکی صدر ڈونلڈ ٹرمپ نے ایران کے ساتھ امن مذاکرات کے لیے پاکستان کے دارالحکومت اسلام آباد بھیجے جانے والے امریکی وفد کا دورہ منسوخ کر دیا ہے۔
انہوں نے کہاکہ یہ دورہ ان کے مطابق وقت کے ضیاع کے مترادف تھا، کیونکہ بہت زیادہ وقت سفر میں صرف ہو رہا تھا اور کام کا بوجھ بھی زیادہ ہے۔
صدر ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا کہ انہوں نے اپنے نمائندوں کا اسلام آباد جانے کا دورہ منسوخ کر دیا ہے جو ایرانی وفد سے ملاقات کے لیے طے تھا۔
انہوں نے مزید کہاکہ ایرانی قیادت کے اندر شدید اختلافات اور کنفیوژن پائی جاتی ہے اور یہ واضح نہیں کہ اصل میں قیادت کون کر رہا ہے۔
صدر ٹرمپ کے مطابق امریکا کے پاس تمام تر برتری موجود ہے جبکہ دوسرے فریق کے پاس کچھ نہیں۔ انہوں نے کہاکہ اگر ایرانی فریق بات کرنا چاہتا ہے تو براہ راست رابطہ کرے۔
