بالی ووڈ اداکار راج پال یادو نے اپنی اہلیہ رادھا یادو کے ساتھ اپنے رشتے اور 12 سالہ عمر کے فرق پر کھل کر گفتگو کرتے ہوئے کہا ہے کہ ان کی زندگی میں رادھا ایک مضبوط سہارا ہیں اور ان کے کیریئر اور ذاتی زندگی دونوں میں اہم کردار ادا کرتی ہیں۔
بھارتی میڈیا کے مطابق اداکار نے حالیہ گفتگو میں شبھنکر مشرا کے ساتھ کہا کہ ان کے درمیان عمر کا فرق تقریباً 10 سے 12 سال ہے، لیکن ان کے تعلق کی بنیاد ہمیشہ باہمی احترام اور مضبوط رابطے پر رہی ہے۔ ان کا کہنا تھا کہ ‘میں ان کا بہت احترام کرتا ہوں، عمر کا فرق ضرور ہے لیکن ہماری بات چیت ہمیشہ بہت مضبوط رہی ہے’۔
یہ بھی پڑھیے: بالی ووڈ اداکار راجپال یادو پر تنقید کے بعد سلمان خان دفاع میں سامنے آگئے
راج پال یادو نے اپنی محبت کی کہانی کا ذکر کرتے ہوئے بتایا کہ ان کی ملاقات کینیڈا کے شہر کیلگری میں ہوئی تھی۔ ان کے مطابق ‘ہماری ملاقات کیلگری میں ہوئی تھی، مجھے آج بھی سمجھ نہیں آتا کہ اتر پردیش کا ایک شخص وہاں اپنی شریکِ حیات کیسے ملا، لیکن یہ سب خوبصورت انداز میں ہوا اور مجھے اندازہ نہیں تھا کہ وہ میری زندگی کا سہارا بن جائیں گی’۔
مزاحیہ انداز میں انہوں نے اپنی پھوپھی کا ایک جملہ بھی یاد کیا جس میں کہا جاتا تھا کہ ‘لنگور کو حور مل گئی’، یعنی ایک سادہ شخص کو بہت خوبصورت شریکِ حیات مل گئی۔
یہ بھی پڑھیے: بھارت کے مشہور مزاحیہ اداکار راجپال یادیو قرض نہ چکانے پر پھر مشکل میں پڑگئے
اداکار نے بتایا کہ رادھا نہ صرف ان کی زندگی کے فیصلوں میں کھل کر رائے دیتی ہیں بلکہ روزمرہ زندگی میں بھی ان کی رہنمائی کرتی ہیں۔ وہ ان کے کپڑے بھی منتخب کرتی ہیں اور گھریلو اخراجات بھی سنبھالتی ہیں۔
راج پال یادو نے اپنی پہلی شادی کا ذکر کرتے ہوئے بتایا کہ وہ 20 سال کی عمر میں شادی کے بندھن میں بندھے تھے لیکن ان کی پہلی اہلیہ بچے کی پیدائش کے دوران وفات پا گئیں، جس سے ان کی ایک بیٹی ہے۔ بعد میں انہوں نے رادھا سے شادی کی جن سے ان کی دو بیٹیاں ہیں۔
