سعودی عرب سے تعلق رکھنے والی 70 سالہ معمر خاتون سلویٰ العمانی نے بیچلرز آف آرٹس کی ڈگری حاصل کرکے سب کو حیران کر دیا اور اس بات کو سچ کر دکھایا کہ عمر کے کسی بھی حصے میں تعلیم حاصل کی جا سکتی ہے۔
سعودی عرب کے معروف اخبار ’عرب نیوز‘ کی رپورٹ کے مطابق سلوٰی العمانی معمر ترین خاتون ہیں جنہوں نے 70 سال کی عمر میں بی اے آنرز کیا۔ سلوٰی العمانی نے امام عبدالرحمٰن بن فیصل یونیورسٹی دمام سے سوشیالوجی میں بیچلرز آف آرٹس کی ڈگری حاصل کی ہے۔
رپورٹ کے مطابق سلوٰی العمانی نے 4.75 جی پی اے کے ساتھ پوری کلاس میں اول پوزیشن حاصل کی، یونیورسٹی کی 44ویں گریجویشن تقریب میں سلوٰی العمانی کو بہترین کارکردگی پر ایوارڈ سے بھی نوازا گیا۔
رپورٹ کے مطابق سلوٰی العمانی نے شادی ہونے کے سبب 50 سال پہلے اپنی تعلیم ادھوری چھوڑ دی تھی تاہم انہوں نے اب ڈگری مکمل کرکے ثابت کردیا کہ عمر کے کسی بھی حصے میں پہنچ کرتعلیم حاصل کی جا سکتی ہے۔
سلوٰی العمانی نے کہا ’میں بیان نہیں کر سکتی ہوں کہ میں اس وقت کیا محسوس کر رہی ہوں، میں نے اپنی زندگی کا وہ خواب پورا کیا ہے جس کے شرمندہ تعبیر ہونے کا میں سوچ بھی نہیں سکتی تھی، میں اللہ کے بعد ان تمام لوگوں کی شکر گزار ہوں جنہوں نے میری اس کاوش کو سراہا ہے۔
انہوں نے مزید کہا کہ میری گریجویشن مکمل ہونے پر یونیورسٹی کے اسٹیج پر مجھے عزت دینے کا لمحہ متاثر کن اور ہمیشہ یاد رکھا جانے والا ہے کیونکہ میں نے 46 سال تک اس کا انتظار کیا ہے۔
’جب تک زندہ رہوں گی تب تک میرے دل میں اس کی یاد زندہ رہے گی۔‘
مزید پڑھیں
انہوں نے مزید بتایا کہ جوانی میں بیچلرز کی ڈگری مکمل کرنے کے لیے یونیورسٹی میں داخلہ لیتے ہوئے کیمسٹری کے مضمون کا انتخاب کیا تھا تاہم جلدی شادی ہونے کے سبب تعلیم کو ادھورا چھوڑنا پڑا تھا۔
رپورٹ کے مطابق سلوٰی العمانی کو 46 سال گزر جانے کے بعد 2016 میں دوبارہ تعلیم مکمل کرنے میں کافی مشکلات کا سامنا کرنا پڑا کیونکہ وہ اپنی تمام تر گزشتہ تعلیمی اسناد کھو چکی تھیں اور اتنے لمبے عرصے کے بعد ازسرنو تعلیم حاصل کرنا ایک چیلنج سے کم نہیں تھا۔
بعد ازاں کسی طرح انہیں جامعہ میں داخلہ مل گیا جس کے بعد انہوں نے تعلیم مکمل کی۔
