بنگلہ دیش بارڈر گارڈز نے ضلع کاکس بازار کے میانمار سے ملحقہ سرحدی علاقے اکھیا میں ایک خصوصی آپریشن کے دوران 282 راؤنڈز گولہ بارود اور ایک مقامی ساختہ چھرا برآمد کرنے کا دعویٰ کیا ہے۔
بی جی بی حکام کے مطابق یہ کارروائی پالونگ خالی بارڈر آؤٹ پوسٹ کے تحت بہار پورہ کے علاقے میں کی گئی۔ انٹیلی جنس معلومات پر کارروائی کرتے ہوئے بی جی بی کی خصوصی پیٹرولنگ ٹیم نے رات گئے علاقے کا محاصرہ کیا۔
یہ بھی پڑھیں: بنگلہ دیشی بارڈر گارڈز کی اسمگلنگ کے خلاف بڑی کارروائی، 84 لاکھ ٹکا مالیت کی بھارتی ساڑیاں برآمد
حکام نے بتایا کہ سیکورٹی اہلکاروں کی موجودگی بھانپتے ہی مسلح اسمگلر یا مبینہ عسکریت پسند اسلحہ اور گولہ بارود موقع پر چھوڑ کر فرار ہونے میں کامیاب ہو گئے۔ تلاشی کے دوران اہلکاروں کو 153 راؤنڈ رائفل ایمونیشن اور 129 راؤنڈ مشین گن ایمونیشن برآمد ہوئے، جس کی مجموعی تعداد 282 بنتی ہے۔
اکھیا بٹالین (64 بی جی بی) کے کمانڈنگ آفیسر لیفٹیننٹ کرنل زاہد الاسلام نے میڈیا کو بتایا کہ مفرور ملزمان کی شناخت اور گرفتاری کے لیے انٹیلی جنس نگرانی مزید سخت کر دی گئی ہے۔
یہ بھی پڑھیں: بنگلہ دیش: ذخیرہ اندوزی کے خلاف کریک ڈاؤن، فیول سپلائی یقینی بنانے کے لیے حکومتی اقدامات تیز
انہوں نے مزید کہا کہ بی جی بی سرحد پار سے اسلحے کی نقل و حمل، منشیات کی اسمگلنگ اور دیگر غیر قانونی سرگرمیوں کو روکنے کے لیے ہائی الرٹ پر ہے اور اس نوعیت کے آپریشنز مستقبل میں بھی جاری رہیں گے۔
