لندن میں منعقد ہونے والی 46ویں لندن میراتھون میں پاکستانی رنرز نے بھرپور شرکت کرتے ہوئے اپنی کارکردگی سے نمایاں مقام حاصل کر لیا۔ دنیا بھر سے تعلق رکھنے والی پاکستانی کمیونٹی کے 30 سے زائد ایتھلیٹس نے نہ صرف اس عالمی ایونٹ میں حصہ لیا بلکہ اپنی رفتار، حکمت عملی اور مستقل مزاجی سے مضبوط تاثر بھی قائم کیا۔
برطانیہ میں مقیم عبداللہ محمد اطہر سب سے نمایاں رہے، جنہوں نے 2 گھنٹے 39 منٹ 53 سیکنڈ کے وقت کے ساتھ تیز ترین پاکستانی رنر ہونے کا اعزاز اپنے نام کیا۔ ان کی کارکردگی کا خاص پہلو متوازن رفتار اور بہترین ریس پلاننگ رہی، جس کے باعث انہوں نے آغاز سے اختتام تک تسلسل برقرار رکھا اور اختتامی مرحلے میں بھی مضبوطی دکھائی۔
یہ بھی پڑھیے لندن: میراتھن پہلی مرتبہ 2 گھنٹے سے کم وقت میں مکمل، کینیا کے سباسٹین ساوے نے تاریخ رقم کردی
کراچی سے تعلق رکھنے والے امین مکاتی نے بھی شاندار دوڑ کا مظاہرہ کرتے ہوئے 2 گھنٹے 45 منٹ 2 سیکنڈ کے ساتھ دوسری پوزیشن حاصل کی۔ انہوں نے محتاط آغاز کے بعد پوری ریس میں اپنی رفتار کو متوازن رکھا اور بغیر کسی نمایاں کمی کے کامیابی سے فِنش لائن عبور کی۔
خواتین کی کیٹیگری میں دبئی میں مقیم سارہ طہور لودھی نے 3 گھنٹے 25 منٹ 2 سیکنڈ کے وقت کے ساتھ سب سے تیز پاکستانی خاتون رنر ہونے کا اعزاز حاصل کیا۔ اگرچہ ریس کے آخری حصے میں ان کی رفتار میں کچھ کمی آئی، تاہم انہوں نے ہمت اور مستقل مزاجی سے ریس مکمل کی۔
دیگر نمایاں کارکردگی دکھانے والوں میں ریحان آدمجی تیسرے تیز ترین پاکستانی رہے، جبکہ عدنان گاندھی نے اپنی سابقہ کارکردگی کو بہتر بناتے ہوئے نمایاں پیش رفت دکھائی۔ اس کے علاوہ کئی پاکستانی رنرز نے چار گھنٹے کے اندر ریس مکمل کر کے اپنی فٹنس اور تیاری کا ثبوت دیا۔
مزید پڑھیے: پنجاب میں ملکی تاریخ کی سب سے بڑی میراتھن اور سائیکلنگ ریس کی تیاریاں مکمل
اس سال لندن میراتھون میں پاکستانی رنرز کی شرکت کی خاص بات ان کی عالمی سطح پر نمائندگی رہی، جس میں برطانیہ، امریکا، یورپ اور مشرق وسطیٰ میں مقیم پاکستانی شامل تھے۔ یہ شرکت اس بات کا ثبوت ہے کہ پاکستانی کمیونٹی میں برداشت کے کھیلوں خصوصاً میراتھون رننگ کا رجحان تیزی سے فروغ پا رہا ہے۔
مجموعی طور پر، پاکستانی ایتھلیٹس نے اس عالمی مقابلے میں اپنی موجودگی کو مؤثر انداز میں منوایا اور مستقبل میں مزید بہتر کارکردگی کی امیدیں روشن کر دیں۔
