وزیراعظم آزاد کشمیر راجہ فیصل ممتاز راٹھور نے وزیراعلیٰ خیبر پختونخوا سہیل آفریدی کے بیانات پر ردعمل دیتے ہوئے کہا ہے کہ عوامی پذیرائی نہ ملنے پر شور شرابہ کرکے توجہ حاصل کرنے کی کوشش کی گئی۔
مزید پڑھیں: فیصل ممتاز راٹھور کا اہم فیصلہ، عامر ذیشان جرال ڈی جی پولیٹیکل افیئرز وزیراعظم سیکریٹریٹ تعینات
میڈیا سے گفتگو میں انہوں نے سہیل آفریدی کے رویے پر گہرے افسوس کا اظہار کرتے ہوئے کہا کہ حکومت نے توقعات سے بڑھ کر مثبت طرزِ عمل اختیار کیا اور جلسے کے انعقاد کے لیے مکمل سہولت فراہم کی۔ تاہم، ان کے مطابق وزیراعلیٰ خیبر پختونخوا نے اپنی سابقہ روش کو دہراتے ہوئے ماحول کو ہنگامہ خیز بنانے کی کوشش کی۔
انہوں نے کہا کہ جب عوامی پذیرائی نہ مل سکی تو سخت زبان اور شور شرابے کا سہارا لیا گیا، جو افسوسناک ہے۔ وزیراعظم آزاد کشمیر نے مزید کہا کہ انہیں پاکستان تحریک انصاف کی قیادت اور خصوصاً سہیل آفریدی کے رویے پر مایوسی ہوئی ہے۔
اس موقع پر انہوں نے مقبوضہ کشمیر کے ضلع کپواڑہ سے تعلق رکھنے والے راجا لیاقت علی خان کے انتقال پر بھی اظہار افسوس کیا اور کہا کہ کشمیری عوام کی قربانیوں کا پوری طرح حق ادا نہیں کیا جا سکا۔
ان کا کہنا تھا کہ حکومت مہاجرین کے مسائل کے حل اور ان کی فلاح و بہبود کے لیے اقدامات جاری رکھے ہوئے ہے، جبکہ ریاست میں مقیم مہاجر کشمیریوں کی بہتری کے لیے کوششیں مزید تیز کی جائیں گی۔
واضح رہے کہ 25 اپریل کو مظفرآباد میں پاکستان تحریک انصاف کے جلسے کے دوران وزیراعلیٰ خیبر پختونخوا سہیل آفریدی نے وزیراعظم آزاد کشمیر کے خلاف سخت زبان استعمال کی تھی۔
