انٹرنیٹ پر ملازمت کی تلاش اب ایک خطرناک کھیل بنتی جا رہی ہے، جہاں ہیکرز ٹیکنالوجی کے ماہرین کو بھی دھوکہ دینے میں کامیاب ہورہے ہیں۔
حال ہی میں ایک سافٹ ویئر پروفیشنل نے سوشل میڈیا پر اپنے ساتھ پیش آنے والے ایک ایسے ہی ہولناک واقعے کی تفصیلات شیئر کی ہیں، جس میں کلاؤڈ فلیئر کے نام پر ایک جعلی تصدیقی صفحہ استعمال کر کے اس کے کمپیوٹر کو ہیک کرلیا گیا۔
یہ بھی پڑھیں: آپ کے گھر کا پتا اور ذاتی معلومات آن لائن فروخت ہو رہی ہیں، تدارک کیا ہے؟
متاثرہ شخص کے مطابق اس نے کرپٹورو نامی کمپنی میں ریموٹ ڈیٹا اینالسٹ کی ملازمت کے لیے درخواست دی تھی، جس کا اشتہار اور انٹرویو کا عمل بظاہر بالکل اصلی لگ رہا تھا۔ انٹرویو کے دوران اسے ایک لنک بھیجا گیا جو بظاہر ایک سیکیورٹی چیک معلوم ہوتا تھا۔ اس صفحے پر صارف کو ہدایت دی گئی کہ وہ اپنے کی بورڈ سے ونڈو پلس آر دبائیں اور پھر کنٹرول وی کر کے انٹر کردیں۔
متاثرہ ٹیکی کو اس وقت اندازہ نہیں تھا کہ جیسے ہی اس نے وہ پیج کھولا، ویب سائٹ نے خود بخود ایک خطرناک کمانڈ اس کے ‘کلپ بورڈ’ پر کاپی کردی تھی۔
جب اس نے کہی گئی شارٹ کٹ کیز استعمال کیں، تو وہ بدنیتی پر مبنی کوڈ (ملیشیئس کمانڈ) اس کے سسٹم میں رن ہو گیا، جس سے ہیکرز کو اس کے کمپیوٹر کا مکمل کنٹرول حاصل ہوگیا۔
یہ بھی پڑھیں: واٹس ایپ ہیکنگ کے بڑھتے واقعات، پی ٹی اے نے عوامی آگاہی کے لیے معلوماتی ویڈیو جاری کردی
یہ پوسٹ وائرل ہوتے ہی صارفین نے اسے ایک انتہائی منظم فراڈ قرار دیا۔ ماہرین کا کہنا ہے کہ اصلی کلاؤڈ فلیئر کبھی بھی صارف سے کی بورڈ شارٹ کٹس استعمال کرنے یا کمپیوٹر میں کوئی کمانڈ چلانے کا مطالبہ نہیں کرتا۔
سوشل میڈیا صارفین نے متنبہ کیا کہ اس طرح کے حملوں کا مقصد کمپیوٹر میں موجود تمام محفوظ کردہ پاس ورڈز، بینکنگ تفصیلات اور حساس ڈیٹا چوری کرنا ہوتا ہے۔
ٹیکنالوجی ماہرین نے مشورہ دیا ہے کہ اگر کوئی بھی ویب سائٹ یا نام نہاد کمپنی انٹرویو کے دوران غیر معمولی تکنیکی اقدامات کرنے یا سسٹم سیٹنگز میں تبدیلی کا کہے، تو اسے فوری طور پر ‘ریڈ فلیگ’ سمجھنا چاہیے۔
یہ بھی پڑھیں: ڈیجیٹل دنیا میں معمولی غفلت بڑے نقصانات کا سبب بن سکتی ہے، اسلام آباد میں سائبر سیکیورٹی آگاہی ویک کا انعقاد
کسی بھی انجان لنک پر کلک کرنے سے پہلے اس کی ویب سائٹ کا ایڈریس (یو آر ایل) ضرور چیک کریں اور کبھی بھی اپنے کلپ بورڈ سے کوئی ایسی چیز پیسٹ نہ کریں جس کا ماخذ معلوم نہ ہو۔
