آزاد کشمیر میں درجہ حرارت بڑھنے کے باعث برف تیزی سے پگھلنے لگی، جس کے نتیجے میں دریاؤں اور ندی نالوں میں اچانک طغیانی کے خدشات میں اضافہ ہوگیا ہے۔
ڈیزاسٹر منیجمنٹ اتھارٹی کے مطابق موسمی تبدیلی کے باعث برف کے تیزی سے پگھلاؤ نے آبی بہاؤ کو غیر معمولی طور پر متاثر کیا ہے اور مختلف مقامات پر پانی کے بہاؤ میں اچانک اضافہ دیکھنے میں آ سکتا ہے۔
حکام کا کہنا ہے کہ کنٹرول لائن پر چکوٹھی کے مقام پر دوپہر 12 سے ایک بجے کے درمیان دریا کے بہاؤ میں اچانک اضافہ ریکارڈ کیا گیا، جس کی ایک ممکنہ وجہ بھارت کی جانب سے اوڑی کے مقام پر اسپل ویز کھولنا بھی ہو سکتی ہے۔
ڈیزاسٹر منیجمنٹ اتھارٹی نے شہریوں کو خبردار کیا ہے کہ وہ دریاؤں اور ندی نالوں کے قریب جانے سے گریز کریں، جبکہ مچھلی پکڑنے والے افراد کو خصوصی احتیاط برتنے کی ہدایت بھی جاری کی گئی ہے۔
