ملک کے بیشتر علاقوں میں آئندہ 12 گھنٹوں کے دوران موسم گرم اور خشک رہنے کا امکان ہے، تاہم بالائی خیبر پختونخوا، گلگت بلتستان، کشمیر اور ملحقہ علاقوں میں دوپہر کے وقت چند مقامات پر تیز ہواؤں اور گرج چمک کے ساتھ بارش متوقع ہے۔
آج صبح ریکارڈ کیے گئے درجہ حرارت کے مطابق اسلام آباد میں 23، لاہور میں 26، کراچی میں 30، پشاور میں 22، کوئٹہ میں 18، مظفرآباد میں 16، گلگت میں 11 اور مری میں 12 ڈگری سینٹی گریڈ ریکارڈ کیا گیا۔
یہ بھی پڑھیے: ملک بھر میں شدید بارشوں، ژالہ باری اور طوفانی ہواؤں کا پھر راج متوقع
کراچی میں آج سے گرمی کی شدت میں مزید اضافے کا امکان ظاہر کیا گیا ہے، جہاں درجہ حرارت پیر کو 41 ڈگری سینٹی گریڈ تک پہنچ سکتا ہے۔ شہر میں گزشتہ روز زیادہ سے زیادہ درجہ حرارت 39 ڈگری سینٹی گریڈ ریکارڈ کیا گیا تھا۔
صورتحال کے پیش نظر وزیراعلیٰ سندھ کی ہدایت پر شہر کے مختلف اضلاع میں ہیٹ ویو کیمپس قائم کر دیے گئے ہیں۔
یہ بھی پڑھیے: پاکستان کا موسم: بیشتر علاقوں میں درجہ حرارت میں اضافہ، بعض علاقوں میں ہلکی بارش کا امکان
دوسری جانب لاہور سمیت پنجاب کے مختلف علاقوں میں کہیں ہلکی اور کہیں تیز بارش کے باعث موسم خوشگوار ہو گیا ہے۔ مغربی ہواؤں کے داخل ہونے کے بعد درجہ حرارت میں واضح کمی ریکارڈ کی گئی ہے اور شہر کا موجودہ درجہ حرارت 29 ڈگری سینٹی گریڈ بتایا گیا ہے۔
شہر میں دن بھر موسم ابر آلود رہے گا جبکہ بعض مقامات پر مزید بارش بھی متوقع ہے۔
