روس نے پیر کے روز یوکرین کے ساتھ جاری جنگ میں 8 اور 9 مئی کے لیے 2 روزہ جنگ بندی کا اعلان کیا ہے جو اس کے سالانہ ’یومِ فتح‘ کی تقریبات کے ساتھ منسلک ہے۔
یہ بھی پڑھیں: روسی دارالحکومت ماسکو کے ایئرپورٹ پر 40 اسرائیلی مسافر زیر حراست
روس نے خبردار کیا ہے کہ اگر یوکرین نے اس جنگ بندی کی خلاف ورزی کی تو سخت جوابی کارروائی کی جائے گی۔
روسی وزارت دفاع کے مطابق یہ جنگ بندی صدر ولادیمیر پیوٹن کے حکم پر نافذ کی گئی ہے تاکہ ’عظیم جنگ‘ میں سوویت عوام کی فتح کو خراجِ تحسین پیش کیا جا سکے۔ بیان میں امید ظاہر کی گئی کہ یوکرین بھی اس جنگ بندی کا احترام کرے گا۔
وزارت نے کہا کہ اگر یوکرین نے 81ویں یومِ فتح کی تقریبات کو متاثر کرنے کی کوشش کی تو روسی افواج شدید اور بڑے پیمانے پر میزائل حملے کے ذریعے جواب دیں گی جس میں کیف کے مرکز کو بھی نشانہ بنایا جا سکتا ہے۔
بیان میں مزید کہا گیا کہ روس نے پہلے انسانی بنیادوں پر ایسی کارروائیوں سے گریز کیا تھا تاہم ضرورت پڑنے پر جواب دینے کے لیے تیار ہے۔
روسی حکام کے مطابق یہ جنگ بندی کی تجویز صدر پیوٹن اور سابق امریکی صدر ڈونلڈ ٹرمپ کے درمیان حالیہ ٹیلیفونک گفتگو میں بھی زیر بحث آئی تھی۔
مزید پڑھیے: پاکستان کو روسی مارکیٹ تک رسائی، سی فوڈ ایکسپورٹ میں بڑی پیش رفت
دوسری جانب یوکرین نے اس تجویز کو تاحال باضابطہ طور پر قبول نہیں کیا۔ یوکرینی صدر وولودیمیر زیلنسکی نے کہا ہے کہ یوکرین کو اس حوالے سے کوئی تفصیلی معلومات موصول نہیں ہوئیں۔
انہوں نے کہا کہ اگر امریکا اور روس کے درمیان کوئی بات چیت ہو رہی ہے تو یوکرین کو اس سے آگاہ رکھنا ضروری ہے کیونکہ یہ جنگ براہ راست یوکرین کے خلاف ہے۔
زیلنسکی نے حالیہ روسی حملوں کا حوالہ دیتے ہوئے کہا کہ میرِفہ اور دنیپرو جیسے شہروں پر حملے اس بات کا ثبوت ہیں کہ جنگ بندی کی باتوں کے باوجود لڑائی جاری ہے۔
یوکرین نے گزشتہ ہفتے واشنگٹن سے اس مجوزہ جنگ بندی کے بارے میں وضاحت طلب کرنے کا اعلان بھی کیا تھا۔
مزید پڑھیں: اسحاق ڈار کا روسی ہم منصب سے رابطہ، دوطرفہ تعلقات اور عالمی امن پر گفتگو
واضح رہے کہ یوم فتح (وکٹری) ہر سال 9 مئی کو روس اور کئی سابق سوویت ممالک میں منایا جاتا ہے جو دوسری عالمی جنگ میں نازی جرمنی پر سوویت یونین کی فتح کی یاد میں ہوتا ہے۔ یہ دن اس تاریخی موقع کی علامت ہے جب سنہ 1945 میں جنگ یورپ میں ختم ہوئی اور سوویت افواج نے نازی جرمنی کو شکست دی۔ اس دن فوجی پریڈز، یادگاری تقریبات اور خراجِ عقیدت کے پروگرام منعقد کیے جاتے ہیں تاکہ جنگ میں جان دینے والے لاکھوں افراد کی قربانیوں کو یاد رکھا جا سکے۔
