ملک کے بیشتر علاقوں میں براعظمی ہوا کے باعث گرم اور خشک موسم برقرار رہنے کا امکان ہے، جبکہ جنوبی علاقوں میں شدید گرمی کی لہر جاری رہے گی۔
مزید پڑھیں: ملک کے کن علاقوں میں گرج چمک کیساتھ بارش کا امکان ہے؟ محکمہ موسمیات نے بتا دیا
محکمہ موسمیات کے مطابق منگل کے روز ملک کے بیشتر حصوں میں موسم گرم اور خشک رہے گا، تاہم بالائی خیبرپختونخوا، گلگت بلتستان، کشمیر اور ملحقہ پہاڑی علاقوں میں کہیں کہیں تیز ہواؤں اور گرج چمک کے ساتھ بارش کا امکان ہے۔ بعض مقامات پر ژالہ باری بھی ہو سکتی ہے۔
بدھ کے روز بھی زیادہ تر علاقوں میں موسم گرم اور خشک رہنے کی پیشگوئی ہے، جبکہ گلگت بلتستان اور کشمیر میں چند مقامات پر بارش اور آندھی کا امکان برقرار رہے گا۔
گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا، جبکہ جنوبی اضلاع میں شدید گرمی ریکارڈ کی گئی۔ تاہم بالائی و وسطی پنجاب، خیبرپختونخوا، گلگت بلتستان اور کشمیر کے چند مقامات پر بارش اور گرج چمک بھی دیکھنے میں آئی۔
سب سے زیادہ بارش پنجاب کے علاقوں جہلم (29 ملی میٹر)، اوکاڑہ (25 ملی میٹر)، سرگودھا (18 ملی میٹر) اور فیصل آباد (15 ملی میٹر) میں ریکارڈ کی گئی، جبکہ خیبرپختونخوا کے مالم جبہ میں 17 ملی میٹر بارش ہوئی۔
گزشتہ روز سب سے زیادہ درجہ حرارت تربت اور مٹھی میں 45 ڈگری سینٹی گریڈ جبکہ کراچی، سبی، لسبیلہ اور ٹھٹھہ میں 44 ڈگری سینٹی گریڈ ریکارڈ کیا گیا۔
اسلام آباد میں جزوی ابر آلود موسم کے ساتھ تیز ہواؤں اور گرج چمک کے ساتھ بارش کا امکان ہے، جبکہ پنجاب کے بیشتر اضلاع میں موسم گرم اور خشک رہے گا اور جنوبی علاقوں میں گرد آلود ہوائیں چلنے کی توقع ہے۔
مزید پڑھیں: ملک بھر میں شدید گرم موسم برقرار، بارش کا امکان نہیں
خیبرپختونخوا کے بالائی علاقوں میں مطلع جزوی ابر آلود رہنے کے ساتھ مختلف مقامات پر بارش کا امکان ہے، جبکہ سندھ اور بلوچستان کے بیشتر علاقوں میں شدید گرم اور خشک موسم برقرار رہے گا۔
کشمیر اور گلگت بلتستان میں بھی جزوی ابر آلود موسم کے ساتھ کہیں کہیں بارش اور گرج چمک کی پیشگوئی کی گئی ہے۔
