ٹیکنالوجی کی دنیا میں تہلکہ مچانے والی حالیہ لیکس نے ایپل کے ستمبر 2026 میں متوقع فلیگ شپ فون ’آئی فون 18 پرو‘ کی تفصیلات سے پردہ اٹھا دیا ہے جس کے مطابق صارفین کو اس بار محض معمولی اپ گریڈ کے بجائے ڈیزائن اور کارکردگی میں نمایاں تبدیلیاں دیکھنے کو ملیں گی۔
لیک ہونے والے ڈیزائن رینڈرز اور اسکیمیٹکس کے مطابق ایپل اپنے پریمیئم ہینڈ سیٹ کے ’ڈائنامک آئی لینڈ‘ کو 25 فیصد تک چھوٹا کرنے کی تیاری کررہا ہے، جس کی چوڑائی اب کم ہو کر تقریباً 14.98 ملی میٹر رہ جائے گی اور یہ فیس آئی ڈی کے مخصوص سینسرز کو اسکرین کے نیچے منتقل کرنے کی بدولت ممکن ہوگا۔
یہ بھی پڑھیں: ایپل کا بڑا فیصلہ، آئی فون 18 مرحلہ وار لانچ ہوگا
رپورٹ کے مطابق آئی فون 18 پرو کا سب سے بڑا مرکزِ نگاہ اس کا پروفیشنل گریڈ کیمرہ سسٹم ہوگا جس میں پہلی بار ’ویری ایبل اپرچر‘ کا فیچر متعارف کرایا جارہا ہے، یہ ٹیکنالوجی عام طور پر پیشہ ورانہ کیمروں میں استعمال ہوتی ہے جو صارف کو روشنی کی مقدار کنٹرول کرنے اور پس منظر کو دھندلا (بوکے ایفیکٹ) کرنے میں غیر معمولی مدد فراہم کرے گی۔
اس کے علاوہ ٹیلی فوٹو لینز میں بھی بہتری لائی گئی ہے تاکہ کم روشنی میں زوم فوٹوگرافی کے نتائج کو بہتر بنایا جا سکے، جبکہ نئے کیمرہ کنٹرولز میں ٹچ کے بجائے پریشر سینسرز استعمال کیے گئے ہیں تاکہ نادانستہ تبدیلیوں سے بچا جا سکے۔
تکنیکی محاذ پر یہ نیا ماڈل ’اے 20 پرو‘ چپ سے لیس ہوگا جو جدید ترین 2 نینو میٹر ٹیکنالوجی پر تیار کی گئی ہے، یہ چپ نہ صرف بجلی کی بچت کرے گی بلکہ آئی او ایس 27 کے جدید ترین مصنوعی ذہانت (اے آئی) کے فیچرز کو بھی سہارا دے گی۔
یہ بھی پڑھیں: آئی فون 17 نے فروخت کے تمام ریکارڈ توڑ دیے
سری کو گوگل جیمنائی ماڈل کے ساتھ جوڑ کر ایک بات چیت کرنے والے اسسٹنٹ میں تبدیل کیا جارہا ہے جو ریئل ٹائم میں اشیا اور مقامات کی شناخت کرنے کی صلاحیت رکھتا ہوگا۔
ڈیزائن کے حوالے سے بتایا گیا ہے کہ ایپل اس بار گلاس اور ایلومینیم کو یکجا کر کے ایک ہموار سطح والا ڈیزائن متعارف کرائے گا جس میں ’ڈیپ ریڈ‘ رنگ کو مرکزی حیثیت حاصل ہونے کا امکان ہے۔
