پاکستان کرکٹ ٹیم کے سابق کپتان اظہر علی نے اپنی نئی اننگز کا آغاز کردیا ہے، وہ اسکاٹ لینڈ کی قومی کرکٹ ٹیم کے ساتھ بطور کنسلٹنٹ منسلک ہو گئے ہیں۔
کرکٹ اسکاٹ لینڈ نے 41 سالہ اظہر علی کی تقرری کا باقاعدہ اعلامیہ جاری کردیا ہے، جس کے تحت وہ دورہ نیپال کے دوران ٹیم کو اپنی پیشہ ورانہ خدمات فراہم کریں گے۔
یہ بھی پڑھیں: اظہر علی کرکٹ بورڈ سے الگ، وجہ سرفراز احمد کی انٹری پر تحفظات یا کچھ اور؟
اسکاٹ لینڈ کرکٹ ٹیم کی اگلی بڑی اسائمنٹ ’آئی سی سی ورلڈ کپ لیگ ٹو‘ ہے، جہاں اسے نیپال اور امریکہ کے خلاف اہم میچز کھیلنے ہیں۔ اظہر علی اس مہم کے دوران اسکاٹش کھلاڑیوں کی مہارت نکھارنے میں مدد کریں گے۔
اپنی اس نئی ذمہ داری کے حوالے سے گفتگو کرتے ہوئے اظہر علی کا کہنا تھا کہ وہ اسکاٹ لینڈ کرکٹ ٹیم کے ساتھ کام کرنے کے لیے بے حد پرجوش ہیں۔
انہوں نے ماضی کی یادیں تازہ کرتے ہوئے کہا کہ ’میرے کیریئر کے ابتدائی دور میں بھی اسکاٹ لینڈ کے ساتھ گہرا تعلق رہا ہے، اس لیے میں اس باصلاحیت ٹیم کی ترقی میں اپنا حصہ ڈالنے کے لیے بہت پرامید ہوں۔‘
یہ بھی پڑھیں: پی ایس ایل 9: شاہین شاہ کی کپتانی ایکسپوز، اظہر علی نے بڑی وجہ بتا دی
واضح رہے کہ اظہر علی کا شمار پاکستان کے کامیاب ترین ٹیسٹ بیٹرز میں ہوتا ہے اور ان کے وسیع تجربے سے اسکاٹ لینڈ کی نوجوان ٹیم کو بین الاقوامی سطح پر اپنی کارکردگی بہتر بنانے میں کافی مدد ملے گی۔ کرکٹ ماہرین اس شراکت داری کو اسکاٹ لینڈ کے لیے ایک مثبت قدم قرار دے رہے ہیں۔
