وفاقی وزیر بحری امور محمد جنید انور چودھری نے کہا ہے کہ گوادر بندرگاہ پر ایک اور کارگو جہاز کامیابی سے لنگر انداز ہو گیا ہے، جو خطے میں اس بندرگاہ کے بڑھتے ہوئے کردار کی واضح علامت ہے۔
اسلام آباد سے جاری بیان کے مطابق ایم وی یوان ہانگ ویئے 11 مئی 2026 کو صبح 10 بج کر 15 منٹ پر گوادر بندرگاہ پر لنگر انداز ہوا۔
وفاقی وزیر کے مطابق جہاز پر قریباً 34 ہزار ٹن سامان اور 20 ہزار کے قریب مختلف اشیا موجود تھیں، جو ٹرانس شپمنٹ سرگرمیوں کے تحت اتاری جا رہی ہیں۔
انہوں نے بتایا کہ اس جہاز پر موجود سامان ابو ظہبی اور کویت کے لیے ہے، جسے گوادر بندرگاہ کے ذریعے منتقل کیا جا رہا ہے۔
محمد جنید انوار چوہدری نے اس پیشرفت کو خطے کی بحری تجارت میں گوادر کے بڑھتے ہوئے کردار کے لیے اہم قرار دیتے ہوئے کہا کہ اس نوعیت کی سرگرمیاں بین الاقوامی سطح پر بندرگاہ کی سہولیات اور اس کی اسٹریٹجک اہمیت پر اعتماد کی عکاس ہیں۔
انہوں نے کہا کہ حکومت بندرگاہ کے بنیادی ڈھانچے اور سہولیات کو مزید بہتر بنانے کے لیے پرعزم ہے تاکہ زیادہ سے زیادہ عالمی شپنگ ٹریفک کو متوجہ کیا جا سکے۔
