وزیراعظم پاکستان کی زیر صدارت امن و امان کی مجموعی صورتحال اور وزارت داخلہ کے امور پر ایک اجلاس منعقد ہوا، جس میں ملک میں سیکیورٹی صورتحال اور ادارہ جاتی کارکردگی کا تفصیلی جائزہ لیا گیا۔
مزید پڑھیں: ملکی سیکیورٹی صورت حال: حکومت نے دفاعی بجٹ میں اضافے کا فیصلہ کرلیا
وزیراعظم نے ہدایت کی کہ عوام کے جان و مال کے تحفظ کو یقینی بنانے کے لیے قانون نافذ کرنے والے اداروں کی صلاحیت بڑھانے کے لیے تمام دستیاب وسائل استعمال کیے جائیں۔
اجلاس میں وزیراعظم نے قانون نافذ کرنے والے اداروں میں کرپشن کے خلاف زیرو ٹالرنس پالیسی پر سختی سے عملدرآمد کی ہدایت کی۔
انہوں نے فیڈرل انویسٹی گیشن ایجنسی (ایف آئی اے) سمیت وزارت داخلہ کے تمام اداروں میں بھرتیاں مکمل طور پر میرٹ کی بنیاد پر کرنے پر زور دیا۔
وزیراعظم نے کہاکہ جدید سیکیورٹی چیلنجز سے نمٹنے کے لیے اہلکاروں کو جدید تربیت اور ضروری مہارتوں سے آراستہ کیا جائے، جبکہ اداروں کو جدید آلات، ٹیکنالوجی اور پیشہ ورانہ سازوسامان کی فراہمی بھی یقینی بنائی جائے۔
اجلاس کو بریفنگ دی گئی کہ اسلام آباد میں زیر تعمیر جیل رواں سال ستمبر میں فعال ہو جائے گی۔
وفاقی وزیر داخلہ نے اجلاس کو ایف آئی اے، اسلام آباد پولیس، این سی سی آئی اے، فیڈرل کانسٹیبلری، سی ڈی اے اور وزارت داخلہ کے دیگر اداروں کی کارکردگی اور آئندہ ترقیاتی منصوبوں پر تفصیلی بریفنگ دی۔
مزید پڑھیں: پنجاب میں مقیم چینی باشندوں سمیت غیر ملکیوں کی سیکیورٹی بڑھانے کا فیصلہ
اجلاس میں نائب وزیراعظم و وزیر خارجہ محمد اسحاق ڈار، وفاقی وزرا محسن نقوی، احسن اقبال، محمد اورنگزیب، وزیر مملکت طلال چوہدری اور قانون نافذ کرنے والے اداروں کے سربراہان نے شرکت کی۔
