معروف میوزک اسٹریمنگ پلیٹ فارم اسپاٹیفائی نے اپنی 20ویں سالگرہ کے موقع پر دنیا بھر کے مداحوں کے لیے ایک منفرد اور دلچسپ فیچر ’اسپاٹیفائی20: یوئیر پارٹی آف دی ایئر‘ پیش کر دیا ہے۔ یہ نیا فیچر صارفین کو ان کے دو دہائیوں پر محیط موسیقی کے سفر کی یاد دلانے اور اسے یادگار بنانے کے لیے ڈیزائن کیا گیا ہے۔
یہ بھی پڑھیں: اسپاٹیفائی کا انسانی گلوکاروں کو اے آئی سے الگ کرنے کے لیے بڑا اقدام، ویریفائیڈ بیج متعارف کرادیا
اس نئے فیچر کے ذریعے صارفین پہلی بار اپنے اسپاٹیفائی اکاؤنٹ سے متعلق ایسی معلومات حاصل کرسکیں گے جو پہلے کبھی دستیاب نہیں تھیں۔ ان میں اسپاٹیفائی پر ان کا پہلا دن، اب تک سنے گئے منفرد گانوں کی کل تعداد، زندگی میں سب سے پہلے اسٹریم کیا گیا گیت اور وہ فنکار شامل ہیں جنہیں اب تک سب سے زیادہ بار سنا گیا۔
یہ فیچر نہ صرف ڈیٹا فراہم کرتا ہے بلکہ اسے ایک ذاتی ٹائم کیپسول کی طرح پیش کرتا ہے جس نے گزشتہ 20 برسوں کے میوزک کلچر کو سمیٹا ہے۔
اسپاٹیفائی نے اپنے مداحوں کے لیے ایک خصوصی ’آل ٹائم ٹاپ سانگ پلے لسٹ‘ بھی ترتیب دی ہے، جس میں صارف کے پسندیدہ ترین 120 گانے شامل ہوں گے۔ اس پلے لسٹ کی خاص بات یہ ہے کہ ہر گانے کے ساتھ اس کے سنے جانے کی تعداد بھی درج ہوگی۔
یہ بھی پڑھیں: علاقائی موسیقی اور ٹیلنٹ کو نئی پہچان دینے والے اسپاٹیفائی کے پاکستان میں 5 سال مکمل
صارفین اس پلے لسٹ کو اپنی لائبریری میں محفوظ کرنے کے ساتھ ساتھ خصوصی شیئر کارڈز کے ذریعے اپنے موسیقی کے ریکارڈز کو انسٹاگرام اور دیگر سوشل میڈیا پلیٹ فارمز پر دوستوں کے ساتھ شیئر بھی کرسکیں گے۔
اس فیچر تک رسائی کے لیے صارفین اپنی موبائل ایپ پر ’اسپاٹیفائی20‘ یا ’پارٹی آف دی ایئر‘ تلاش کرسکتے ہیں یا براہِ راست ویب براؤزر کے ذریعے اسپاٹیفائی کی ویب سائٹ پر جا کر اپنے یادگار میوزک سفر کا حصہ بن سکتے ہیں۔
اسپاٹیفائی کے مطابق اس اقدام کا مقصد ان گلوکاروں اور پرستاروں کو خراجِ تحسین پیش کرنا ہے جنہوں نے گزشتہ 2 دہائیوں میں اس پلیٹ فارم کو موسیقی کی دنیا کا محور بنایا۔
