اسپاٹیفائی نے اپنی پلیٹ فارم پر مصنوعی ذہانت سے تیار کردہ موسیقی کی بھرمار اور اس سے پیدا ہونے والے خدشات کے پیشِ نظر ایک اہم اپ ڈیٹ جاری کی ہے۔ کمپنی نے ویریفائیڈ بائی اسپاٹیفائی کے نام سے ایک آفیشل بیج متعارف کرایا ہے، جس کا مقصد انسانی گلوکاروں اور صرف مصنوعی ذہانت پر مبنی پروفائلز کے درمیان واضح فرق کرنا ہے۔
یہ بھی پڑھیں: اسپاٹیفائی حقائق: جشن کوئی بھی ہو انداز ایک، بھنگڑا پاکستانیوں کی پہلی پسند
یہ بیج گلوکار کے نام کے ساتھ ہلکے سبز رنگ کے ‘چیک مارک’ کی صورت میں ظاہر ہوگا۔ اس کی اہلیت کا تعین ایک خودکار فلٹرنگ سسٹم کے ذریعے کیا جائے گا۔
فلٹرنگ سسٹم پروفائل کی انگیجمنٹ ہسٹری اور سننے والوں کی سرگرمی، اسپاٹیفائی کی پالیسیوں کی پاسداری، لائیو کنسرٹس کی تاریخیں، تجارتی سامان کی دستیابی اور منسلک سوشل میڈیا اکاؤنٹس کا جائزہ لے گا۔
صرف ٹیکنالوجی پر انحصار کرنے کے بجائے اسپاٹیفائی انسانی جائزہ لینے والوں کی مدد بھی لے رہا ہے تاکہ ان پروفائلز کی تصدیق کی جاسکے جو درست طریقے سے کام کررہے ہیں۔ اس کا آغاز پلیٹ فارم پر سب سے زیادہ سرچ کیے جانے والے فنکاروں سے کیا گیا ہے۔
یہ بھی پڑھیں: کتابوں کے شوقین افراد کے لیے اسپاٹیفائی کا شاندار فیچر
اس کے علاوہ اسپاٹیفائی نیوٹریشن لیبلزکی طرح فنکاروں کی معلومات کی تفصیلات فراہم کرنے پر بھی تجربہ کر رہا ہے تاکہ صارفین کو گلوکار کے پس منظر اور ساکھ کے بارے میں بہتر آگاہی مل سکے۔
یہ اقدام ان شکایات کے بعد اٹھایا گیا ہے جن میں صارفین نے مصنوعی ٹریکس اور اے آئی پر مبنی پروفائلز کے بڑھتے ہوئے رجحان کی نشاندہی کی تھی۔ اسپاٹیفائی کو ماضی میں وفات پا جانے والے فنکاروں کے پروفائلز میں اے آئی سے تیار کردہ گانے شامل کرنے پر بھی سخت تنقید کا سامنا کرنا پڑا تھا۔
کمپنی کا کہنا ہے کہ وہ مصنوعی ذہانت سے بنے مواد کو ترجیح نہیں دیتی اور مواد چرانے والے یا نقالی کرنے والے پروفائلز کو فعال طور پر ہٹاتی ہے، تاہم وہ ان فنکاروں کی حمایت جاری رکھے گی جو ذمہ داری کے ساتھ اے آئی کا استعمال کرتے ہیں۔
