امریکا میں ایک معمولی گھریلو لیک کی مرمت کے لیے 250 ڈالر ادا کرنے پر ایک خاتون حیرت میں مبتلا ہو گئی اور اس تجربے نے سوشل میڈیا پر بیرونِ ملک رہنے والے افراد کے لیے بڑھتے ہوئے اخراجات پر نئی بحث چھیڑ دی۔
انسٹاگرام صارف امرتا سنگھ نے اپنی ویڈیو میں بتایا کہ انہیں گھر میں ایک چھوٹے سے لیک کی مرمت کے لیے بھاری رقم ادا کرنا پڑی، جسے انہوں نے بھارت میں ہونے والے اخراجات سے موازنہ کرتے ہوئے ’حیران کن حقیقت‘ قرار دیا۔
View this post on Instagram
امرتا سنگھ کا کہنا تھا کہ ’ہم نے آج ایک چھوٹے سے لیک کی مرمت کے لیے 250 ڈالر ادا کیے۔ امریکا میں کسی بھی چھوٹی گھریلو مرمت کے لیے عموماً 100 سے 200 ڈالر تک خرچ آتا ہے کیونکہ یہاں مزدوری کی لاگت بہت زیادہ ہے۔ ہر چھوٹے کام کے لیے بھی زیادہ رقم ادا کرنا پڑتی ہے‘۔
ویڈیو میں ایک شخص کو گھر کے اندر پائپ کی مرمت کرتے ہوئے دیکھا جا سکتا ہے جبکہ خاتون نے کیپشن میں لکھا کہ بھارت میں یہی کام تقریباً 500 سے 1000 روپے میں ہو جاتا ہے مگر امریکا میں اس پر 250 ڈالر خرچ آئے۔
یہ ویڈیو وائرل ہونے کے بعد سوشل میڈیا پر بحث کا باعث بن گئی جہاں متعدد صارفین نے امریکا میں مزدوری اور سروس چارجز کی بلند قیمتوں پر تبصرے کیے۔ ایک صارف نے لکھا کہ ’امریکا میں مزدوری واقعی بہت مہنگی ہے‘۔
دوسرے صارف نے کہا کہ ’وہاں کی آمدنی کے مطابق اخراجات بھی زیادہ ہوتے ہیں‘۔ جبکہ ایک اور صارف کا کہنا تھا کہ ’اسی وجہ سے امریکا میں لوگ اکثر چھوٹے کام خود کرنا سیکھ لیتے ہیں‘۔
