امریکی صدر ڈونلڈ ٹرمپ اور چینی صدر شی جن پنگ کے درمیان اعلیٰ سطحی ملاقات کے پہلے روز عالمی مالیاتی منڈیوں نے محتاط مگر مثبت ردِعمل ظاہر کیا ہے۔
دونوں رہنماؤں کے درمیان جاری مذاکرات میں تجارتی کشیدگی میں کمی کی توقعات نے سرمایہ کاروں کے اعتماد کو سہارا دیا۔
عالمی اسٹاک مارکیٹوں میں تیزی دیکھی گئی جبکہ خام تیل کی قیمتوں میں معمولی کمی ریکارڈ کی گئی۔
یہ بھی پڑھیں: خام تیل کی قیمتوں میں معمولی کمی، آبنائے ہرمز کشیدگی اور ایران امریکا تنازع برقرار
تاہم مشرقِ وسطیٰ، خصوصاً خلیجی خطے سے جڑے جغرافیائی خطرات اب بھی عالمی منڈیوں پر اثر انداز رہے۔
بین الاقوامی منڈی میں برینٹ کروڈ کی قیمت 0.40 فیصد کمی کے بعد 105.21 ڈالر فی بیرل پر آ گئی، جبکہ امریکی ویسٹ ٹیکساس انٹرمیڈیٹ خام تیل 0.07 فیصد کمی کے ساتھ 100.95 ڈالر فی بیرل پر بند ہوا۔
امریکی صدر ڈونلڈ ٹرمپ نے دعویٰ کیا ہے کہ چینی صدر شی جن پنگ نے آبنائے ہرمز کو کھولنے میں مدد کی پیشکش کی ہے۔
🚨 REAL-TIME MARKET UPDATE
📍 Trump in China: "fantastic" trade deals with Xi, but markets react with caution. Beijing orders 200 Boeing jets (below expectations) and is negotiating oil and soybean purchases.
Nvidia H200 still in limbo.
📉 US futures slide: S&P 500 -0.5%, Nasdaq… pic.twitter.com/PfJ3bOYpeq— ImperiumAlpha (@ImperiumAlpha) May 15, 2026
مارکیٹ ماہرین کے مطابق تیل کی قیمتوں میں یہ معمولی کمی اس امید کا نتیجہ ہے کہ ٹرمپ اور شی جن پنگ کے درمیان مذاکرات عالمی تجارت کو مستحکم بنانے اور معاشی دباؤ میں کمی کا باعث بن سکتے ہیں۔
تیل کی قیمتوں میں نرمی کے بعد سرمایہ کاروں نے نسبتاً زیادہ رسک لینے کی طرف رجحان دکھایا، جس کے نتیجے میں ٹیکنالوجی اور برآمدات سے وابستہ کمپنیوں کے حصص میں نمایاں خریداری دیکھی گئی۔
امریکی اسٹاک انڈیکس ایس اینڈ پی 500 تقریباً 0.6 فیصد اضافے کے ساتھ نئی ریکارڈ سطح پر پہنچ گیا، جبکہ نیسڈیک کمپوزٹ میں 1 فیصد سے زائد اضافہ ریکارڈ کیا گیا۔
مزید پڑھیں: مشرق وسطیٰ میں پھر کشیدگی، عالمی مارکیٹ میں خام تیل کی قیمتوں میں اضافہ
ان منڈیوں میں نمایاں بہتری کی قیادت سیمی کنڈکٹر اور مصنوعی ذہانت یعنی اے آئی سے متعلق کمپنیوں نے کی۔
سرمایہ کاروں نے ان خبروں کا بھی خیرمقدم کیا کہ واشنگٹن ممکنہ طور پر وسیع تر تجارتی مذاکرات کے تحت چین پر اے آئی چپس کی برآمدی پابندیوں میں نرمی پر غور کر رہا ہے۔
