پاکستانی شوبز کی ابھرتی ہوئی اداکارہ دنانیر مبین نے اپنی بے باک رائے سے ایک بار پھر سوشل میڈیا پر بحث چھیڑ دی ہے۔ انہوں نے بالی ووڈ کی کلاسک فلم ’دیوداس‘ کو سخت الفاظ میں ’اوورریٹڈ‘ قرار دیتے ہوئے اس کے پلاٹ اور کہانی پر سوالات اٹھا دیے۔
دنانیر مبین جو اس وقت اپنی نئی فلم ’میرا لیاری‘ کی تشہیر میں مصروف ہیں، ایک مختصر چیٹ سیشن میں شریک ہوئیں جہاں انہوں نے فلمی کلاسکس سے متعلق مختلف سوالات کے جواب دیے۔
چیٹ سیشن کے دوران جب ان سے پوچھا گیا کہ ان کے خیال میں کون سی کلاسک فلم اوورریٹڈ ہے تو انہوں نے بغیر کسی ہچکچاہٹ کے ’دیوداس‘ کا نام لیا۔
انہوں نے کہا کہ فلم کی کہانی انہیں غیر منطقی اور کمزور محسوس ہوتی ہے۔ کہانی کیا ہے؟ لڑکا شرابی ہے، ایک عورت ہے جس کی عزت نہیں ہے۔ ایک بے شرم باپ ہے۔ کوئی اور عورت ہے جو ایک اور مرد کے لیے مجبور ہے۔
یہ بھی پڑھیں: ’میں بھی انسان ہوں‘، تصاویر پر تنقید کے بعد اداکارہ دنانیر مبین نے خاموشی توڑ دی
اداکارہ نے کہا کہ کیا یہ ایک کلاسک فلم ہے، کیا ہم شراب کو گلیمرائزڈ کررہے ہیں۔ تاہم انہوں نے فلم کی شاندار پروڈکشن ویلیوز، لباس اور سیٹ ڈیزائن کو سراہا۔ ان کا کہنا تھا کہ جیولری، کپڑے اور سیٹ اچھا تھا۔
ان کے اس بیان کے بعد سوشل میڈیا پر ملا جلا ردعمل سامنے آ رہا ہے، جہاں کچھ لوگ ان کی رائے سے اتفاق کر رہے ہیں جبکہ کچھ اسے متنازع قرار دے رہے ہیں۔
